Ishyaka rya Mugabe rirashinja ibihugu byo mu Burengerazuba bw’isi gushaka kumuhirika ku butegetsi

Nyuma y’imyigaragambyo imaze iminsi muri Zimbabwe, abigaragambya basaba Perezida Mugabe gukemura ikibazo cy’ubushomeri cyangwa akegura, ishyaka rye Zanu PF ryashinje ibihugu byo mu burengerazuba bw’isi kuba inyuma y’imyigaragambyo iri kuba.

Amakuru dukesha AfricaReview aravuga ko abigaragambya muri iki gihugu bashinja Leta kutita ku kibazo cy’ubushomeri kiri mu gihugu bagasaba Perezida Mugabe kumva ibyifuzo byabo.

Agatsiko k’abantu bakorera ku mbuga nkoranyambaga kazwi nka #ThisFlag ndetse na Sosiyete sivile by’iki gihugu nibo bayoboye iyi myigaragambyo basaba ko iki kibazo gikemuka cyangwa Mugabe akegura.

Ignatious Chombo, umunyabanga mukuru w’ishyaka Zanu PF rya Perezida Mugabe yabwiye itangazamakuru ko umukuru w’igihugu atazegura nkuko bisabwa n’abigaragambya.

Chombo kandi yanatunze agatoki ibihugu byo mu burengerazuba kuba inyuma y’umugambi wo gutegura guhirika Perezida Mugabe ku butegetsi.

Yavuze kandi ko Zanu PF ikomeye kandi itapfa kunyeganyezwa n’ibikorwa by’imyigaragambyo.

Abateguye iyi myigaragambyo kuri uyu wa Gatatu bifashishije Hashtag ku rubuga rwa Twitter #ShutDownZimbabwe 2016 bavuga ko bazongera kwigaragambya mu cyumweru gitaha niba Leta itagize icyo ikora.

Mugabe uri ku butegetsi kuva muri 1980, mu mezi make ashize, ubutegetsi bwe bwakomeje guhura no kwiyongera kw’abigaragambya basaba ko ikibazo cy’ubukene n’ubushomeri cyarangizwa vuba.

Zanu PF yamaze gutanga Perezida Mugabe nk’umukandida wayo mu matora ya Perezida azaba muri 2018.

Yisangize Inshuti.

Ibitekerezo

Tanga Igitekerezo