Perezida Magufuli yahagaritse icuruzwa ry’amabuye y’agaciro

1

Perezida w’igihugu cya Tanzaniya Dr John Pombe Magufuli yahagaritse ubucuruzi bw’amabuye y’agaciro acukurwa muri iki gihugu akajya gucuruzwa hanze yacyo, akavuga ko akwiye kubyarizwa umusaruro mu gihugu imbere.

Ibi uyu muyobozi ukunze kurangwa n’udushya mu gufata ibyemezo bikakaye, yabitangaje ku cyumweru dusoje tariki ya 31 Nyakanga 2016 ubwo yari yasuye abaturage b’ahitwa Kahama.

The East African iviga ko Perezida Magufuli yavugiye mu ruhame ko abacukura amabuye y’agaciro muri iki gihugu bakwiye gushora imari mu gihugu imbere aho gukomeza kuyagurisha hanze y’igihugu, ndetse ashimangira ko ibi Leta ya Tanzaniya itazakomeza kubyihanganira.

Perezida Magufuli kandi yavuze ko mu bihugu byose bifite amabuye y’agaciro, Tanzaniya ari yo yonyine igurisha umusaruro wayo mu mahanga, bityo yemeza ko bigomba guhagarara bidatinze.

Yagize ati: “Biratangaje kubona abashoramari bapakira amabuye yacu mu ndege bakayajyana mu bindi bihugu, ndagira ngo mbivuge, bagomba kubikorera hano muri Tanzaniya mu rwego rwo guhesha agaciro amabuye yacu. Ibi bikozwe kubera ko bajyanaga aya mabuye Leta ikahatakariza imisoro.”

Ibi Perezida Magufuli abikoze nyuma y’ubusabe butandukanye bwatangwaga n’impuguke mu by’ubukungu muri iki gihugu, zasabaga uyu muyobozi guhagarika burundu icuruzwa ry’amabuye y’agaciro hanze y’igihugu cya Tanzaniya.

Aba bahanga mu by’ubukungu bavuga ko iri hagarikwa ryazagira akamaro bitewe n’uko ngo Leta y’iki gihugu yatakazaga akayabo k’amafaranga y’imisoro bitewe n’uko itabashaga gukurikirana neza amafaranga n’agaciro k’amabuye y’agaciro yabaga yagurishijwe.

Yisangize Inshuti.

Ibitekerezo 1

  1. Uyu mu president niba atari imihini mishya,arerekana yuko akunze igihugu nabaturage bacyo mugihe abandi bakunze inda zabo nimiryango yabo gusa !! twizere yuko atazahinduka.

Tanga Igitekerezo