Perezida Kenyatta yatangaje ibyiyumviro bye ku mirwano irimo kubera muri Sudani y’Epfo

Uhuru Kenyatta yababajwe bikomeye n’ibikomeje kubera muri Sudan y"Epfo

Perezida wa Kenya Uhuru Kenyata yasabye impande zishyamiranye muri Sudani y’Epfo guhagarika imirwano irimo kubera mu mujyi mukuru Juba kuko ngo barimo guhungabanya uburenganzira bw’abaturage batuye iki gihugu dore ko abarenga 150 bamaze gusiga ubuzima muri iyi mirwano.

Mu butumwa bwa Perezida Uhuru Kenyatta yanyijije k’umuvugizi wa Leta ya Kenya Manoah Esipisu, yavuze ko bibabaje kongera kumva intambara mugihugu cy’igituranyi nkuko ikinyamakuru Dailynation cyabyanditse.

Yagize ati: "Mubyukuri ibi ni ibihe bikomeye kandi bibabaje ku baturanyi bacu, twifatanyje n’akarere ndetse n’Isi yose dusaba ko ibikorwa by’ubugome bishyira ubuzima bw’umuturage mu kaga bihagarara, turizera ko umutekano ugiye guhita ugaruka mu rwego rwo kurengera ubuzima bw’abaturage ba Sudani y’Epfo kuko uburenganzira bwabo bwarahungabanyijwe bikomeye"

Manoah Esipisu yakomeje avuga ko Kenyatta yasabye Perezida Salva Kiir na Visi Perezida wa mbvere Dr. Riek Machar ndetse na Visi Perezida James Wani Igga kuyobora abaturage ba Sudani Y’Epfo neza nkuko babibategerejeho bakareka gukomeza kurasana bica abaturage bo mu mujyi wa Juba.

Iyi mirwano ihuje ingabo za Perezida Kiir n’izabatavuga rumwe na we yatangiye kuri uyu wa Kane nyuma y’aho iki gihugu cyizihizaga isabukuru y’imyaka itanu kimaze kibonye ubwigenge. Kuva ubwo abaturage batangiye gupfa abandi batangira kuva mu byabo.


Riek Machar (ibumoso) Salva Kiir (hagati) na James Wani Igga ntibavuga rumwe ku mitegekere ya Sudani y’Epfo

Kuva iki gihugu kibonye ubwigenge muri 2011 cyabaye mu bihe by’intambara cyane cyane nyuma y’Ukuboza 2013 aho Perezida Kiir yashinjaga Machar gushaka kumuhirika kubutegtsi.

Muri Kanama 2015 impande zombi zaricaye zisinyana amasezerano y’amahoro ndetse zemeranya gushyiraho guverinoma ihuriweho n’impande zombi ariko ikigaragara ni uko nta mahoro birimo gutanga kuko nubundi imirwano irakomeje kandi abantu baracyapfa.

Akanama ka Loni gashinzwe amahoro na ko kemeje ko iyi mirwano ari igihamya cyerekana ko amasezerano y’amahoro hagati ya Kiir na Machar ndetse n’ababashyigikiye ntacyo yagezeho.

Yisangize Inshuti.

Ibitekerezo

Tanga Igitekerezo