Perezida Jacob Zuma yaciriwe amarenga n’abanyamuryango be ko ashobora kwicwa

Michael Zuma, murumuna wa Perezida Jacob Zuma uyobora igihugu cya Afurika y’Epfo yavuze ko afite ubwoba bw’uko Perezida Zuma ashobora kwicwa naramuka atarekuye ubutegetsi muri 2019.

Ibi arabihera ku kuba Perezida Zuma amaze iminsi akurikiranwe mu nkiko ku mitungo ya Leta yakoresheje mu nyungu ze ubwo yubakaga inzu ye bwite aho yaregwaga gukoresha umutungo wa Leta ufite agaciro k’ibihumbi 543 by’amadorali ($543,000).

Arabihera kandi ku kuba urukiko rw’ikirenga ruherutse kumuhamya icyaha cyo kutubahiriza Itegeko Nshinga mu ngingo ivuga gukoresha nabi umutungo wa rubanda ari na byo byamuviriyemo kwishyura amafaranga ya Leta yashinjwaga gukoresha yubaka inzu ye bwite.

Kuri ubu kandi Jacob Zuma arashinjwa ruswa n’ikimenyane mu gutanga imirimo ikomeye muri Leta aho bivugwa ko ayiha inshuti ze za hafi.

Arabihera kandi ku nsinzwi idasanzwe ishyaka ANC rya Perezida Zuma riherutse kugira mu matora aheruka kuba muri iki gihugu aho iri shyaka ryatsinzwe mu buryo butigeze kubaho kuva mu 1994, ibi byose bakabishinja imiyoborere ya Parezida Zuma.

Winnie Madikizela-Mandela, wari umugore wa Nelson Mandela wayoboye Afurika y’Epfo na we aherutse kuvuga ko Afurika y’Epfo ikeneye umuyobozi mwiza nubwo yirinze kubwira Jacob Zuma ko agomba kuva ku butegetsi.

Izi mpungenge Michael Zuma n’umugore we Thembekile MaXulu Zuma bazigaragarije ikinyamakuru Sunday Times kuri uyu wa 25 Nzeli 2016.

Michael Zuma yagize ati: “Mukuru wanjye ari mu bihe bikomeye ntigeze mbona, ibihe bikomeye urimo biduteye ubwoba bw’uko bashobora no kukwica”

Thembekile, umugore wa Michael na we yagize ati: “duhangayikishijwe n’ubuzima bwe, nk’umuryango we tuba dutekereza ko bagiye kumwica, turifuza ko yareka politiki akagaruka ku ivuko agahunga abo banzi be”

Aba bombi kandi bavuga ko bababajwe n’uburyo Perezida Zuma amaze iminsi afatwa nk’umuntu w’igisambo kandi nyamara ngo bo bamubona nk’umuntu ukunda abaturage be.

Bavuga ko babona Perezida Zuma akwiye kureka akazi ka Politiki agasubira ku ivuko mu Ntara ya KwaZulu-Natal.

David Mahlobo, Minisitiri w’umutekano muri Afurika y’Epfo yavuze ko nta byinshi yatangaza ku mutekano wa Perezida. Bongani Ngqulunga, uvugira Perezidansi y’Afurika y’Epfo avuga ko na we ntacyo yatangaza ku bijyanye n’ibyo abanyamuryango ba Perezida Zuma batangaje.

Zuma yagiye ku butegetsi muri 2009, akaba azarangiza manda ze ebyiri z’imyaka itnu (imwe imwe) muri 2019 nkuko Itegeko Nshinga ry’iki gihugu ribiteganya.

Yisangize Inshuti.

Ibitekerezo

Tanga Igitekerezo