Papa Francis yihanije abapadiri muri Nigeria, abategeka gusaba imbabazi cyangwa bakirukanwa

Papa Francis yategetse abapadiri bo muri diyosezi ya Ahiara mu Majyepfo ashyira Uburasirazuba bwa Nigeria kumusaba imbabazi cyangwa bakirukanwa ku mirimo yabo.

Yabitangaje nyuma yo guhura n’itsinda ry’abihayimana bavuye muri iyo diyosezi mu cyumweru gishize.Iryo tsinda ryari rije kuganira na Papa ku bwumvikane buke buri muri iyo diyosezi, aho abapadiri bamwe banze Musenyeri bahawe mu mwaka wa 2012.

Papa Francis yavuze ko kwanga Musenyeri Peter Okpaleke washyizweho na Papa Benedigito XVI ari ugusuzugura Kiliziya n’Ubuyobozi bwayo.

Yabwiye itsinda ryaturutse muri Nigeria ko ababajwe cyane n’uko gusuzugura kw’abapadiri, ategeka ko bamusaba imbabazi bitarenze tariki 9 Nyakanga uyu mwaka, batabikora bakirukanwa.

Afurika ni umwe mu migabane ifite umubare munini w’abantu bagenda binjira mu idini gatulika.Ikinyamakuru PremiumTimes cyatangaje ko kuba Papa yacyashye abo bapadiri ari ukugirango abo bakirisitu bashya biyongera batazagera ubwo bivumbura ku buyobozi bw’i Roma.

Muri 2015, iyo diysezi yari ifite abakirisitu 520,000 mu bantu 675,000 bayituye.Yari ifite abapadiri basaga 130.

Yisangize Inshuti.

Ibitekerezo

Tanga Igitekerezo