Papa Francis yakiriye Perezida Kabila baganira ku bibazo byugarije Kongo

1

Papa Francis yakiriye Perezida wa Repubulika iharanira Demukarasi ya Kongo (RDC) amugira inama y’uko akwiye kwitwara mu bibazo by’umutekano muke wugarije iki gihugu, amubwira ko hakenewe ibiganiro bihuriweho mu rwego rwo kugarura amahoro n’umutekano muri Kongo.

Perezida wa RDC Joseph Kabila yakiriwe i Vatican kuri uyu wa 26 Nzeri 2016, ku butumire bw’umushumba wa Kiliziya gaturika ku Isi Papa Francis.

Nubwo ubutumire bwa Papa Francis bwo guhura na Perezida Kabila bwatanzwe mbere y’imyigaragambyo yabaye muri iki gihugu igahitana abatari bake, ibiganiro byabo ngo byibanze cyane ku buryo bwo kugarura umutekano muri iki gihugu nkuko bigaragara mu itangazo ryashyizwe aharagara na Leta ya Vatican.

Iri tangazo ryavugaga ko ibiganiro bya Papa Francis na Kabila “ Byibanze cyane ku bibazo bikomeye byugarije politiki ndetse n’imishyamirano imaze iminsi ibera mu murwa wa Kongo, byibanze kandi ku kamaro k’ubufatanye hagati y’impirimbanyi za politiki n’abahagarariye sosiyete sivile ndetse n’abanyamadini mu rwego rwo kugarura ubwumvikane binyuze mu biganiro bihuriweho byo kugarura amahoro n’umutekano mu gihugu”

Ibi biganiro kandi ngo “byibanze ku karengane karimo gukorerwa abaturage bo mu burasirazuba ndetse banavuga ko hakenewe ubufatanye bwihuse ku rwego rw’igihugu no ku rwego mpuzamahanga kugirango hatangwe ubufasha bushoboka mu gusigasira uburenganzira bw’abaturage”

Jeune Afrique yatangaje kandi ko ibi biganiro ngo byanagarutse ku nkunga ikomeye kiliziya gaturika itera Repubulika iharanira Demukarasi ya Kongo mu Burezi, ubuzima no kugabana ubukene.

Ku itariki 19 na 20 Nzeri, uyu mwaka i Kinshasa, mu mujyi mukuru wa Kongo, hagaragaye imyigaragambyo ikomeye yaguyemo abantu basaga 40.

Iyi myigaragambyo yari ihanganishije inzego zishinzwe umutekano n’abashyigikiye uruhande rw’abatavuga rumwe na Leta basaba Perezida Kabila kurekura ubutegetsi ubwo azaba asoje manda ze ebyiri yemererwa n’itegeko nshinga zizarangira mu Kuboza uyu mwaka.

Itegeko nshinga rya Repubulika ya Kongo ntiryemerera Perezida Kabila kongera kwiyamamariza umwanya w’umukuru w’igihugu cyangwa gukomeza kuyobora nyuma ya manda ebyiri ariko kuri ubu komisiyo y’amatora muri iki gihugu iratangaza ko nta bushobozi buhari bwo gutegura amatora kandi ko amatora nataba Perezida Kabila azakomeza kuyobora Kongo.

Yisangize Inshuti.

Ibitekerezo 1

Tanga Igitekerezo