"Narapfuye ndongera ndazuka nk’ibisanzwe" Perezida Mugabe

1

Perezida wa Zimbabwe, Robert Mugabe, yabaye nk’utebya ku bihuha byari bimaze iminsi bivugwa ku buzima bwe, maze avuga ko yapfuye akongera akazuka nkuko asanzwe abigenza.

Mugabe w’imyaka 92, biherutse kuvugwa ko amerewe nabi n’indwara aho yari amaze iminsi adahari abantu batangira no kuvuga ko habonetse undi Perezida w’inzibacyuho.

Amakuru yavaga kuri bamwe bo ku kibuga cy’indege yavugaga ko yakoreye urugendo muri Aziya y’Uburasirazuba ariko we avuga ko yari yanyarukiye i Dubai mu bibazo by’umuryango.

Bimwe mu bihuha bikaba byaravugaga ko Mugabe afite ibibazo bikomeye by’ubuzima byatumye ajya kwivuriza i Dubai, mu gihe urubuga The Southern Daily rwo rwari rwatangaje ko afite uburwayi bukomeye bw’imitsi ndetse Visi Perezida we Emmerson Mnangagwa ariwe uyoboye mu gihe cy’inzibacyuho.

Gusa ikinyamakuru Reuters cyatangaje ko akigera I Harare Mugabe yagitangarije ati “Nari nagiye mu bibazo by’umuryango, ni I Dubai mu mpamvu z’umwe mu bana banjye”.

Yakomeje atebya ati “Nibyo,nari napfuye, nibwo koko nari napfuye. Narazutse nkuko mpora mbigenza.Nagarutse mu gihugu cyanjye ndi Mugabe nyawe”.

Mugabe akaba ategerejwe mu kiganiro ari bugeze ku rubyiruko kuri uyu wa Gatandatu. Akaba yaragiye ku Butegetsi muri 1980 akaba atangaza ko azongera kwiyamamaza muri 2018.

Mu gihe amaze ayobora Zimbabwe yagiye ihura n’ibizazane byinshi ari ibya Politiki ndetse n’ubukungu nubwo uyu mukambwe atahwemye kuvuga ko ari imyumvire yagiye izanwa n’abazungu.

Mu minsi ishize muri iki gihugu hashize iminsi habaye imyigaragambyo yo kwamagana Mugabe ndetse hari benshi batawe muri yombi.

Yisangize Inshuti.

Ibitekerezo 1

Tanga Igitekerezo