Musenyeri Desmond Tutu yavuze ko umunsi nugera, azasaba agafashwa gupfa

Musenyeri wacyuye igihe muri Afurika y’Epfo Desmond Tutu, yavuze ko bibabaje kubona ku isi abantu baharanira uburenganzira bw’ikiremwamuntu, ariko uburenganzira bw’umuntu bwo kwihitiramo igihe azapfira ntibwubahirizwe.

Tutu yabitangarije ikinyamakuru Washington Post mugihe yizihiza isabukuru y’imyaka 85 amaze avutse.

Yagize ati “Kuri uyu wa Gatanu ndagira imyaka 85, ubuzima bwanjye buragana ku iherezo kurusha uko buva ku itangiriro.Ndifuza ko abantu bahabwa icyubahiro n’igihe bashaka gupfa. Nkuko nakunze kubihamya, abantu barembye, batagifite icyizere cyo kubaho bagomba kwerekwa urukundo igihe bapfa.Abantu bagiye gupfa bakwiye guhitamo igihe n’uburyo bazapfamo.Kandi mubyo bahitamo hagomba no kubaho gufashwa gupfa.”

Gufashwa gupfa ku bantu barembye kandi bari kubabara cyane bikunze kubaho iyo bisabwe na nyir’ubwite, umuryango we ndetse n’amategeko y’igihugu akaba abyemera.Icyakora si henshi byemerwa kuko bifatwa nko kuvutsa umuntu ubuzima.
Musenyeri Tutu yavuze ko nta mpamvu abakeneye gupfa kandi bababara batahabwa uburenganzira bwo gupfa.

Ati “Nziko twese tuzapfa kandi gupfa ni kimwe mu bigize ubuzima.Abantu barembye kandi bababazwa bafite uburenganzira ku buzima bwabo, kuki badahabwa uburenganzira bwo kwihitiramo uko bapfa? Kuki hari ababahatira kubabara birenze urugero kandi bo batabishaka?Niteguye gupfa kandi navuze ko ntashaka gukomeza kubaho (mbabara) uko bizagenda kose.”

Tutu yavuze ko azashyigikira umukirisitu wese wumva ko gupfa ari amahitamo y’umuntu kandi bikwiye kujya mu burenganzira bwe.

Ati “Iyo duhakaniye umuntu uburenganzira bwo gupfa kandi mu cyubahiro, tuba tunaniwe kwerekana urukundo kandi ariryo pfundo ry’ubukirisitu.Ndifuza ko abanyapolitiki, abashyiraho amategeko n’abayobozi b’amadini, bagira umwete mu gushyikigira amahitamo y’abarembye bifuza gupfa kandi igihe cyo kubikora ni iki.”

Yisangize Inshuti.

Ibitekerezo

Tanga Igitekerezo