Muri 2050, ku isi abayisilamu bazaba baruta abakirisitu-Ubushakashatsi

Ubushakashatsi bwagaragaje ko abayoboke b’idini ya isilamu bari kwiyongera ku muvuduko usanzwe, ndetse ko mu mwaka wa 2050 ari ryo dini rizaba ari irya mbere mu kugira abayoboke benshi ku isi.

Kuri ubu abakiristu nibo benshi ku isi bagakurikirwa n’abayisilamu.Ubushakashatsi bwakozwe n’ikigo Pew Research Center bwagaragaje ko mu mwaka wa 2050, nibura 10 % y’ibihugu bigize umugabane w’Uburayi bizaba byarahindutse abayisilamu.

Ubwo bushakashatsi bugaragaza ko kuva muri 2010 kugeza muri 2050, abayisilamu bazaba biyongereye ku kigero cya 73%, naho abakirisitu biyongere ku kigero cya 35 %.

Abakoze ubwo bushakashatsi bavuga ko ubwo bwiyongere buzaterwa nuko iimiryango y’abayisilamu ari minini, abagore b’abayisilamukazi babyara cyane kurusha abatari bo, aho nibura umwe abarirwa abana 3.1, mu gihe abo mu yandi madini babarirwa abana 2.3.

Ubwo bwiyongere kandi buzaterwa n’uko benshi mu bayoboke ba Isilamu ari bato ugereranyije n’abayoboke b’ayandi madini.Ku mpuzandengo (moyenne) ngo umuyoboke wa Isilamu aba arushwa imyaka irindwi n’abayoboke b’andi madini nkuko CNN yabitangaje.


Ubwiyongere bw’abanyamadini muri 2050/Source:Pew Research Center

Mu bushakashatsi bwakozwe muri 2015, Pew yagarageje ko abayoboke ba Isilamu bazava kuri miliyari 1.6 mu mwaka wa 2010, bakagera kuri miliyari 2.76 muri 2050, mu gihe biteganyijwe ko isi izaba ituwe n’abantu bagera kuri miliyari 9.

Abakirisitu bo biteganyijwe ko bazava kuri miliyari 2.17 bakagera kuri miliyari 2.92.

Icyakora, muri Leta Zunze Ubumwe za Amerika, abashyigikiye ishyaka ry’abarepubulike bafite imyumvire itari myiza ku idini ya isilamu, bitewe n’ibitekerezo bya Perezida Trump kuri iryo dini, ndetse n’ingamba yagiye afata zirimo gukumira abantu baturuka mu bihugu bigendera ku mahame ya Isilamu.

Yisangize Inshuti.

Ibitekerezo

Tanga Igitekerezo