Kizza Besigye yemeye ibiganiro na Museveni ariko ashyiraho umwihariko w’ibyo bazaganira

Besigye na Vastina Katushabe wiyamamariza kuba umudepite

Dr Kizza Besigye uyobora ishyaka riharanira impinduka za Demukarasi [Forum for Democratic Change (FDC)] wanarihagarariye mu matora ya Perezida yabaye muri Gashyantare uyu mwaka, yavuze ko ashobora kwemera kuganira na Perezida Yoweri Kaguta Museveni ariko bakavuga gusa ibyerekeye ku kuva k’ubutegetsi kwa Museveni kuko ngo atigeze atsinda amatora.

Kuba Kizza Besigye yemeza ko ari we watsinze amatora ariko akavuga ko Museveni yamwibye amajwi ngo bituma abona nta kindi kintu ashobora kuganira na Perezida Museveni batavuga rumwe uretse kuganira ku ngingo yo kuva ku butegetsi kwe n’ishyaka rye NRM.

Ati: " Twe ntabwo twanga ibiganiro n’ishyaka NRM(rya Museveni) ariko bigomba kuba byerekeye gusa ku kuva k’ubutegetsi, bitabaye ibyo bazagenda mu bundi buryo, niba badashaka ko tubivugaho amaherezo yabo azaba mabi"

Dr. Kizza yavuze ko Guverinoma ya Museveni yafashe ubutegetsi ku ngufu ikoresheje inzego z’umutekano zazengurutse icyicaro gikuru cy’ishyaka FDC no kumufungira iwe mu rugo nyuma y’amatora we avuga ko yatsinze ku majwi 52% kuri 44% ya Museveni.

Ati : "Kuri ubu nubwo batwibye amajwi bakagerageza kubihisha byaragaragaye ko twatsinze, Perezida Museveni ntiyatsindiye kuyobora igihugu, aho nyuze hose baravuga bati Perezida w’abaturage yaje kandi ntabwo tuzemera gukuraho icyemezo cy’abaturage"

Ibi Besigye yabitangarije mu gace k’ubucuruzi gaherereye mu karere ka Rubanda ubwo yamamazaga abakandida babiri Vastine Katushabe Mutatina na Joseph Ruhangariyo biyamamariza kuba abadepite mu nteko ishinga amategeko.

Besigye yabwiye abamushigikiye ko badakwiye gucika intege batageze ku ntego yabo yo kuyobora igihugu nkuko ikinyamakuru Chimpreports kibitangaza.

Dr Kizza Besigye uyu munsi yari yaherekejwe na Meya wa Kampala Erias Lukwago, Abadepite barimo Mubarak Munyagwa, Francis Mwijukye, na Roland Kaginda, n’abandi banyacyubahiro bo mu ishyaka rye.

Yisangize Inshuti.

Ibitekerezo

Tanga Igitekerezo