Kenya: Umupolisi yasabye umukunzi we umwanya wo kuganira, yanze aramurasa aramwica na we arirasa

1

Uyu ni Anne Wanjohi wishwe arashwe n’umupolisi bakundanaga

Umupolisi mukuru (Officer) wo mu gihugu cya Kenya yarashe umukobwa wari umukunzi we aramwica nawe arirasa ashaka kwiyahura ariko ntiyapfa.

Uyu mupolisi witwa Njoroge Njau yarashe umukunzi we witwa Anne Wanjohi akoresheje imbunda akoresha mu kazi. Impamvu yamuteye kurasa uyu mukobwa amusanze mu nzu icuruza murandasi ntabwo yahise imenyekana.

Mu masaha y’igitondo nibwo uyu mupolisi yinjiye mu nzu uyu mukobwa yari arimo amusaba umwanya wo kuvugana na we ariko umukobwa amubwira ko ahuze cyane nta mwanya wo kuganira na we afite, umupolisi yamwingize ariko umukobwa arahakana aratsemba amubwira ahuze.

Uyu mupolisi yasohotse muri iyi nzu ababaye cyane abwira uyu mukobwa ko akwiye kwibuka ko nta wundi muntu yakunze nkuko amukunda arangije amubwira ko agiye ariko mu kanya gato aje akagaruka.

Ubwo uyu mupolisi yari agarutse, yafashe ukuboko umukobwa, amutunga imbunda mu gituza amubwira ko agiye kumwica yarangiza na we akiyica.

Inkuru dukesha Dailynation ikomeza ivuga ko uyu mupolisi yahise amurasa isasu rimwe mu gituza aramurekura, mu gihe umukobwa yari akirimo kuribwa n’isasu, umupolisi yahise amurasa andi masasu abiri mu gahanga aramwica.

Nyuma yo kwica uyu mukobwa, umupolisi yateye ubwoba abari bari muri iyo nzu bose ababwira ko bose agiye kubica niko guhita birukanka barahunga dore ko nubundi gukiza Anne byari bitagishobotse kuko yari amaze gupfa.

Nyuma y’akanya gato abaje batabaye basanze wa mupolisi aryamye hasi iruhande rwa wa mukobwa ari intere agifite imbunda yo mu bwoko bwa pisitori yakoresheje yica wa mukobwa.

Abaturage bahuruje polisi ije ihita ijyana kwa muganga umupolisi mu gihe umurambo wa wa mukobwa na wo wajyanwe mu buruhukiro bw’ibitaro mu gihe iperereza rikomeje.

Kubera ko muri iki gihugu hakomeje kugaragara umubare munini w’abapolisi basigaye bica abantu na bo bakiyica, abaharanira uburenganzira bwa muntu barasaba ko hajyaho serivise yo kugira inama aba bapolisi kugirango bareke kwiyahura no kwica abantu cyane cyane abakunzi babo n’abavandimwe.

Yisangize Inshuti.

Ibitekerezo 1

Tanga Igitekerezo