Kenya: Ingabo ziryamiye amajanja nyuma yo gukupirwa itumanaho na Al Shabaab

Inzego z’umutekano muri Kenya ziryamiye amajanja nyuma y’uko Al Shabaab isenyeye itumanaho mu duce tumwe nw tumwe tw’iki gihugu kuri uyu wa gatanu tariki 24 Kamena 2016.

Ku munsi w’ejo igipolisi cy’iki gihugu cyatangaje ko mu gace ka Damasa mu karere ka Mandera, inyeshyamba z’umutwe wa Al Shabaab zasenye umunara wa sosiyete y’itumanaho ya Safaricom.

Polisi yavuze ko ibi byabaye mu ma saa saba y’ijoro ryo ku wa gatanu tariki ya 24 Kamena 2016 ubwo humvikanaga urusaku rukomeye rw’iturika ry’ibisasu muri ako gace.

Muri iri joro ni bwo Al Shabaab yasenye umunara wa telefoni ndetse n’ahatunganyirizwa amazi muri aka gace naho hakaba hasenywe, ibintu byanatumye itumanaho rya Polisi n’ ikigo cya gisirikare cya Damasa rivaho.

Daily Nation dukesha iyi nkuru ivuga ko ubu muri kariya gace harimo gukoreshwa itumanaho rya Hormud ryo muri Somalia ariko ngo rikaba rihenze cyane.

Inzego z’ubutasi muri Kenya zatangaje ko muri Damasa hagaragaye amakamyo 13 manini ahetse imyeshyamba za Al Shabaab zituruka muri Somalia.

Izi nyeshyamba ngo zari zigamije gutera ikigo cya gisirikare cy’ ingabo za Kenya KDF kiri I Damasa cyangwa se ingabo za Somalia ziri I Baroche ku mupaka wa Somalia.

Umunara wasenywe ndetse n’iyi soko y’amazi, byose biherereye mu birometero bibiri gusa uvuye ku kigo cya gisirikare cya Damasa.

Nyuma y’iki gikorwa ngo ubu umutekano wakajijwe muri ako gace mu rwego rwo kwitegura ko isaha n’isaha bakongera bagaterwa n’izo nyeshyamba.

Igihugu cya Kenya gikunda kwibasirwa n’ibitero by’abarwanyi b’umutwe wa Al Shabaab, aho aba barwanyi bayiziza kuba yaratanze ingabo muri Somalia, ingabo ziriyo mu rwego rwo guhangana n’uyu mutwe.

Yisangize Inshuti.

Ibitekerezo

Tanga Igitekerezo