Inzobere muri Politiki zagiriye Kabila inama y’icyatuma amatora ya Perezida agenda neza

1

Raporo nshya yasohowe n’itsinda ryiga kuri Politiki ya Kongo, iraburira Leta ya Kongo kutemerera Joseph Kabila kwiyamamaza nk’umukandida mu matora y’umukuru w’igihugu ndetse no gutanga ubushobozi kuri komisiyo y’amatora kugirango amatora azabe ku itariki yagenwe.

Iyi Raporo yakozwe n’itsinda ryiga kuri politiki ya Kongo [Groupe d’Etudes sur le Congo (GEC)] ku bufatanye n’ishami rya kaminuza ya Kinshasa ryigisha ibya politiki (Center for Political Studies of the University of Kinshasa.)

Iyi raporo ifite umutwe w’amagambo ugira uti: " Kongo mu rugamba rukomeye rw’amatora". Muri iyi raporo aba bahanga batanze inama zikomeye kuri politiki ya Kongo cyane cyane ku migendekere myiza y’amatora.

Aba bahanga basabye Guverinoma ya Kongo kwemeza ko Perezida Kabila ataziyamamariza kongera kuyobora Kongo ndetse no kudahindura ingingo ya 220 y’itegeko nshinga ry’iki gihugu.

Izi nzobere muri politiki kandi zasabye Guverinoma guha komisiyo y’amatora ubushobozi bwose bushoboka kugira ngo itegure neza amatora kandi azabe ku itariki yagenwe kandi abe mu mucyo no mu bwisanzure.

Basabye Leta kandi gutanga ubwisanzure mu baturage no kubareka bakagaragaza ibyiyumviro byabo babinyujije mu myigaragambyo, kuri ibi hakiyongera ko Leta yasabwe gufungura infungwa zose za Politiki mu rwego rwo kongera ubwisanzure n’uburenganzira bw’abatavuga rumwe na Leta muri aya matora.

Izi nzobere kandi ngo zasabye Perezida Kabila gutangaza we ubwe ko ataziyamamaza mu matora ateganyijwe kuba mu mpera z’uyu mwaka nkuko Radio Okapi ibitangaza.

Hashize iminsi amatora ateganyijwe muri iki gihugu atavugwaho rumwe hagati ya Leta n’abatavuga rumwe na yo nyuma yuko Guverinoma itangaje ko nta bushobozi buhagije buhari bwo gutegura amatora, abatavuga rumwe na Leta bahise babibonamo amayeri yo gushaka kugundira ubutegetsi kwa Perezida Kabila.

Ibi babihera ku kuba Guverinoma yaratangaje ko ubushobozi bwo gutegura amatora nibukomeza kubura Perezida Kabila azakomeza kuyobora, bityo bo bakabona nta kibazo cy’ubushobozi buke gihari ahubwo ari amayeri yo kugundira ubutegetsi.

Gusa abahanga mu bya politiki bagaragaje ko ibi bishobora kuzabyara imvururu zikomeye kuko abatavuga rumwe na Leta nka Etienne Tshisekedi wagarutse muri Kongo avuye mu Bubiligi kuwa 27 Nyakanga 2016 na Moise Katumbi ndetse n’ababashyigikiye batakwihanganira umwanzuro wo kuburizamo amatora.

.

Yisangize Inshuti.

Ibitekerezo 1

  1. bibaye byiza ntago bacyemura ibibazo by force nibareke buri ruhande ruvuge uko rubyumva maze ikibazo gishakirwe umuti peacefully.murakoze kudusangiza ijambo.

Tanga Igitekerezo