Inzira y’umusaraba imfungwa zo muri Siriya zanyuzwagamo zigiye kumanikwa

1

Gereza ya Saynadaya, aho iyicarubozo ryaberaga

Umuryango uharanira uburenganzira bwa muntu Amnesty International wasohoye icyegeranyo kigaragaza ko imfungwa ibihumbi n’ibihumbi mu gihugu cya Siriya zishwe zimanitswe mu gihe cy’imyaka itanu ndetse inasobanura iyicarubozo zakorerwaga mbere yo kwicwa.

Uyu muryango muri Raporo uvuga ko ibyo bikorwa byatangiye mu mwaka wa 2011 kugeza mu 2015, kandi ko buri cyumweru habaga hari igikundi cy’imfungwa ziri hagati ya 20 na 50 zabaga zigomba kumanikwa.

Nubwo Leta yagiye ibihakana, uwo muryango uvuga ko Guverinoma ariyo yasabaga ko abo bantu bicwa kandi bakicwa n’abashinzwe umutekano.

BBC yatangaje ko Amnesty yavugishije abantu 84 muri raporo yayo.Bamwe muri bo ni abahoze ari imfungwa ndetse n’abayobozi b’amagereza.

Bavuze ko abicwaga batoterezwaga muri gereza ya Saydnaya mu mujyi wa Damascus mu ibanga rikomeye.

Mbere yo kwicwa, ngo imfungwa zazanwaga mu rukiko rwihariye rwa gisirikare aho urubanza rwamaraga hagati y’umunota umwe n’iminota itatu.

Umwe mu bahoze ari abacamanza ba gisirikare babwiye Amnesty ko imfungwa yabazwaga niba yemera kuba yarakoze icyaha ishinjwa, yasubiza ’Yego’ cyangwa ’Oya’ ngo yagombaga gukatirwa urwo gupfa.

Mbere yo kujya kumanikwa, imfungwa zabanzaga kubwirwa ko zigiye kwimurirwa muri gereza ya gisivili, zikimurirwa mu kumba aho zakubitirwaga inkoni mu gihe cy’amasaha atatu.

Mu masaha y’ijoro, bajyanwaga mu kindi cyumba akaba aribwo babwirwa ko bakatiwe urwo gupfa, ubwo imigozi yo kubamanika nayo ikaba iri hafi.Nyuma yo gupfa imirambo yapakirwaga mu makamyo ikajyanwa mu bitaro bya Gisirikare bya Tishreen mu mujyi wa Damascus kubarurwa, nyuma bagashyingurwa mu byobo rusange mu masambu y’igisirikare.

Raporo ivuga ko nibura abantu bari hagati y’ibihumbi bitanu na 13 000 bishwe batyo mu myaka itanu.

Ubuhamya bwa bamwe mu ababjijwe:

Uwahoze ari umucamanza: "Barabarekaga bamanitse hagati y’iminota 10 na 15.Hari abatarapfaga kuko bataremereye.Nk’abakiri bato, biyicirwaga n’ibilo byabo.Abayobozi barabamanuraga, (abatarapfa) bakabavuna amajosi."

Samer wahoze ari imfungwa:

"Gukubitwa byari bikabije, byabaga bimeze nk’umusumuri bari gukubita ngo winjire mu rutare.Bakomezaga bakubita.Hari ubwo nifuzaga ko banca amaguru aho gukomeza kuyakubita.

Hamid, umusirikare wafungiwe muri gereza ya Saydnaya:

" Iyo wategaga amatwi hasi kuri sima, wumvaga amajwi nk’ayamazi ajojoba.Bikamara nk’iminota 10.Twasinziraga twumva amajwi y’abantu benda gupfa, njye nari narabifashe nk’ibisanzwe."

Amnesty International ivuga ko nta cyizere ko iyicarubozo nk’iryo ryarangiye muri Siriya.Ikomeza ivuga ko ibi ari ibyaha by’Intambara ndetse n’ibyibasiye inyokomuntu.

Ngo abayobozi bo muri Siriya ntabwo bifuje kugira iccyo batangaza kuri iyo raporo.

Umwaka ushize uyu muryango wari wasohoye indi raporo igaragaza ko hagati ya 2011 na 2015 imfungwa zisaga ibihumbi 17 zaguye mu magereza zizize iyicarubozo, kwimwa ibiryo, amazi ndetse n’ubuvuzi.Iyo mibare ntabwo habarirwagamo abo bishwe bamanitswe muri gereza ya Saynadaya.

Yisangize Inshuti.

Ibitekerezo 1

Tanga Igitekerezo