Obama asize nkuru ki muri Afurika ?

1

Barack Hussein Obama, yavutse tariki 4 Kanama 1961, yavukiye Honolulu mu ntara ya Hawaii muri Leta Zunze Ubumwe za Amerika. Yabaye Perezida wa Leta zunze ubumwe za Amerika guhera tariki ya 4 Ugushyingo 2008 akaba azasoza manda ye mu mpera z’uyu mwaka wa 2016.

Obama yakunze kunengwa n’abayobozi bakomeye mu bihugu by’Afurika barimo nyakwigendera Muammar Gaddafi wayoboraga Libya, Perezida wa Zimbabwe Robert Mugabe n’abandi bagiye bamushinja kuba yarateye umugongo umugabane wa Afurika afitemo inkomoko.

Barack Obama yavutse ku babyeyi babiri batandukanyije ubwnegihugu, nyina w’umuzungu na se w’umwirabura wo muri Kenya.

Obama ni Perezida wa 44, wa Leta Zunze Ubumwe za Amerika, kandi ni na we mwirabura wa mbere waboye icyo igihugu gikomeye ku isi.

Yagiye ku butegetsi benshi bamwitezeho ibikorwa biteza imbere Afurika kurusha abamubanjirije, gusa benshi bemeza ko hari ibikorwa yakoze bigaragara nubwo abandi bavuga ko ahubwo yayisenye kurusha uko yagiye ku butegetsi imeze.

Obama igisobanuro cy’inzozi za Martin Luther King

Dr. Martin Luther King yavukiye i Atlanta muri Georgia, muri Leta Zunze Ubumwe z’Amerika ku itariki ya 15 Mutarama 1929; atabaruka tariki ya 4 Mata 1968, afite imyaka 39 y’amavuko.

Uyu mugabo yaranzwe no guharanira uburenganzira bwa muntu muri Amerika cyane yamagana ivanguraruhu ryari ryarashinze iminzi hagati y’Abirabura n’abazungu.

JPEG - 35.4 kb
Obama igisobanuro cy’Inzozi za Martin Luther

Luther yabaye ikirangirire kubw’imbwirwaruhame ‘I Have a Dream’ cyangwa ‘Mfite inzozi’ ririmo amagambo agaragaza ko abazungu n’abirabura igihe kizagera bakareshya muri Leta Zunze Ubumwe z’Amerika ndetse hakabaho na Perezida w’umwirabura.

Nyuma y’imyaka itagera kuri 50 Luther Atabarutse,Obama yatorewe kuba Perezida w’Amerika ku nshuro ya mbere, bamwe mu basesenguzi, biganjemo Abanyafurika, bumvise ari nk’aho inzozi z’intwari y’umwirabura Martin Luther King zibaye impamo.

Nkuko urubuga New York Times rwabitangaje, akigera ku butegetsi yari ashyize imbere ibintu bine muri Afurika birimo: guteza imbere imiyoborere myiza ya za Guverinoma, iterambere ry’ubukungu, guhangana n’indwara z’ibyorezo birimo SIDA na Malaria ndetse no guhashya amakimbirane mu bihugu nka Guinea, Somalia, Sudan, Repubulika Iharanira Demokarasi ya Congo, Niger, Madagascar ndetse n’ibindi.

Ibi byashyize igitutu kuri Obama ndetse biremamo n’icyizere Abanyafurika bari biteze ko azakora ibidasanzwe nk’umuntu ufite inkomoko kuri uyu mugabane.

Isura ya Obama muri Afurika itaniye he n’iya Clinton na Bush?

Byinshi mu bikorwa Obama yakoze birimo kurwanya iterabwoba, imishinga y’iterambere no guhanga imirimo ndetse no kurwanya indwara, gusa imwe mu mishinga ikaba yari yatangiwe na bagenzi be barimo George W. Bush na Bill Clinton.

Bill Clinton:

Muri manda ya mbere, Bill Clinton, yagize icyasha inshuro ebyiri ku mugabane w’Afurika ubwo yananirwaga kugarura amahoro muri Somaliya, ndetse no mu 1994 Leta ye inanirwa gutabara u Rwada ubwo hakorwaga Jenoside yakorewe Abatutsi.

Gusa nyuma yo guta ibaba muri Afurika, Perezida Clinton muri Manda ye ya kabiri yatangije ibikorwa byo guhangana n’indwara z’ibyorezo no kurwanya ubukene muri Afurika.

Muri ibyo, harimo gahunda ishinzwe ubuhahirane n’Afurika yatangije yitwa ’Africa Growth and Opportunity Act ’ (AGOA) byatumye agaciro k’ubuhahirane kikuba gatatu kakagera kuri miliyari 22 z’amadorali muri 2012.

George W. Bush

George W. Bush yayoboye kuva 2001 kugeza muri Mutarama 2009. Yamenyekanye cyane mu ntambara zo mu Burasirazuba bwo hagati harimo iyahiritse ku butegetsi Saddam Hussein ndetse n’urugamba yatangiye muri Afghanistan rwo guhiga bukware Ossama Bin Laden waje kwivuganwa n’Ubutegetsi bwa Obama muri 2011.

Muri Afurika, George W. Bush ashinjwa intege nke mu ntambara ya Congo na Darfur, ariko akaba azibukirwa muri gahunda yo kurwanya icyorezo cya SIDA muri Afurika yakijije ubuzima bwa benshi izwi ku izina rya PEPFAR.

Abanyafurika bifuzaga Obama kurusha bamwe mu Banyamerika

Tariki 4 Ukwakira 2008 ni bwo Obama yari atorewe kuyobora Amerika ku nshuro ya mbere ndetse muri 2009 ahita asura ibihugu by’Afurika aribyo Ghana na Misiri, atangaza ko agiye kuzamura ubuhahirane muri Afurika.

Gusa Abakurikiranira hafi, icyizere cyaje gusa n’ikiraza amasinde kuko manda ye ya mbere yaranzwe no guhangana n’imitwe y’iterabwoba no gukuraho abakuru b’ibihugu Amerika yise ‘Abanyagitugu’ aho kugarura umutekano birawuzambya.

Abantu kandi ntibazibagirwa ibikorwa by’ Umuryango w’ibihugu byo mu majyaruguru ya Atlantique, NATO, ubwo bagabaga ibitero simusiga muri Afurika y’Abarabu bigakuraho igihangange ‘Ghadaffi’ wayoboraga Libya, byatumye akarere k’Afurika y’Amajyaruguru n’igice cy’uburengerazuba hasigara intambara zikihayogoza na magingo aya.

Ubucuruzi hagati y’Amerika n’Afurika

Ubwo Obama yarimo agaba ibitero mu mpande zitandukanye z’isi, ibindi bihugu byari biri gushyira ingufu mu buhahirane buteza imbere Afurika. Ibi byatumye ibihugu nk’u Bushinwa, u Buhinde, Turukiya n’ibindi biba nk’ibikuye ku isoko u Burayi n’Amerika.

Obama yaje kwibuka imihigo yahize kuri Afurika

Kera kabaye Obama yagiriye ingendo zitandukanye kuri uyu mugabane harimo Senegal, Afurika y’Epfo na Tanzania maze ahita atangira gukora ibikorwa bitandukanye.

Yahise atangiza Gahunda yise Power Africa initiative igamije kugeza amashanyarazi angana na 30 000 Megawati yagombaga kugera ku bantu miliyoni 60 batuye munsi y’ubutayu bwa Sahara.

JPEG - 93.2 kb
Benshi mu bakuru b’Ibihugu bamuvumira ku gahera

Yatangiye ibikorwa kandi byo gutanga amahirwe yo kwiga ku rubyiruko rw’Afurika, ikindi kandi yakomeje kwagura gahunda ya Bill Clinton ‘AGOA’.

Muri manda ya kabiri Obama yakoze kandi ibikorwa bitandukanye muri Afurika harimo gusura ibihugu bitatu nka Kenya na Ethiopiya muri 2015.

Yakiriye abakuru b’Ibihugu na za Guverinoma bya Afurika muri 2014 ndetse abemerera inkunga ya Miliyari 14 z’amadorali zo kunoza ubuhahirane.

Amerika ntiyafungura udushumi tw’u Bushinwa muri Afurika

Uwahoze ayobora u Bushinwa Hu Jintao, yasuye Afurika inshuro eshanu, asura ibihugu 18 hagati ya 2009 kugeza muri 2012. Naho uwamusimbuye, Xi Jinping, uruzinduko rw’akazi rwa mbere yakoreye muri Afurika maze ahita atangaza ko u Bushinwa buzatanga umwenda wa miliyari 20 mu myaka itatu ndetse ahita asinya amezerano y’ibikorwa n’ibihugu nka Kenya, Tanzania, na Repubulika Iharanira Demukarasi ya Congo. Mu mwaka wa 2014, u Bushinwa bwatangaje ko bwongereye kuri uwo mwenda miliyari 10 z’amadorali.

Nkuko bitangazwa n’ikinyamakuru ‘Foreign Policy in Focus’, u Bushinwa bwazamuye ishoramari muri Afurika ku kigereranyo cya 1000% hagati ya 2000 na 2010. Ibi byatewe nuko bwari bukeneye amabuye y’agaciro yo gukoresha mu nganda zabo bagurana gufasha imishinga y’ibikorwa remezo birimo imihanda, ibiraro, ibyambu, ibibuga by’indege ku mugabane wose.

Mu mwaka wa 2014 ubucuruzi bw’u Bushinwa n’Afurika bwari bufite agaciro ka miliyari 198 z’amadorali mu gihe Amerika yatanze miliyari 100 z’amadorali gusa.

u Bushinwa buha ubuhe butumwa Amerika kuri Afurika?

Benshi bibaza niba kuba Amerika itafungura udushumi tw’Abashinwa mu ishoramari bitaba aribyo byatumye Obama yibanda ku mutekano ndetse no ku bikorwa bifitiye inyungu Abanyamerika kurusha ibifitiye akamaro Abanyafurika.

Nubwo abahanga bavuga ko atari bibi kugira ubufatanye burimo inyungu nkuko Abanyamerika babikora, ariko biri kugaragara ko bitari kuyihira ugereranyije nuko isoko rihagaze.

Kuba u Bushinwa bwarize uburyo bwo gushora imari muri Afurika mu gihe kirekire kandi ntibusabe inyungu yihuse, butivanga muri politiki y’ibihugu, abahanga bavuga ko ari ubutumwa bukomeye kuri Amerika ndetse na n’ubutumwa k’uzasimbura Perezida Obama ngo agarure isura y’Amerika muri Afurika.

JPEG - 84.1 kb
Ni Perezida wa 44 wa Leta Zunze Ubumwe z’America
JPEG - 83.9 kb
Obama ntiyacanaga uwaka na Ghadaffi
JPEG - 63.4 kb
Obama akomoka muri Africa
JPEG - 105.3 kb
Obama yishimiwe n’umuryango we ubwo yazaga muri Kenya
JPEG - 433.9 kb
Ubwo Perezida Kagame yakirwaga muri white House

Eric Birori

Yisangize Inshuti.

Ibitekerezo 1

Tanga Igitekerezo