Ibya Sudani y’Epfo bikomeje gusubira irudubi, Abatavuga rumwe na Kiir bisubiranyemo

Uyu ni Taban Deng Gai wasimbuye Riek Machar ku mwanya wa Visi Perezida wa Sudani y’Epfo.

Abashyigikiye Riek Machar bashyizeho undi umusimbura ku mwanya wa Visi Perezida nyuma yo kubona ko yahunze nyuma y’imirwano yahitanye abasaga 300, gusa umuvugizi wa Machar yatangaje ko ibyakozwe atabyemera kuko byakozwe rwihishwa ndetse abashinja guhirika Machar k’umwanya wa Visi Perezida.

Nyuma yaho mu gihugu cya Sudani y’Epfo hongeye kwaduka intambara, Riek Machar ari na we Visi Perezida w’iki gihugu yahise ahunga ajya mu bwihisho kugeza n’ubu.

Ibi byatumye mu minsi ishize Perezida Salva Kiir atanga itegeko ko Machar agaruka mu kazi bitarenze tariki 23 Nyakanga (Ejo hashize) bagafatanya kugarura amahoro mu gihugu ndeste amwizeza umutekano usesuye ariko Machar ntiyigeze agaragara kugeza umunsi wa nyuma yahawe ugeze.

Aljazeera dukesha iyi nkuru ivuga ko Machar yavuze ko agomba kugaruka mu mirimo ye igihe inzego mpuzamahanga zizaba zamuhaye abasirikare bo kumurindira umutekano ndetse n’abamushyigikiye bahamije ku wa gatanu ko Machar atazagaruka kuko ngo yahunze Perezida Kiir washakaga kumwica.

Abashyigikiye Riek Machar babonye umunsi ntarengwa yahawe wo kugaruka mu kazi ugeze ataraza bigiriye inama yo gushyiraho uwitwa Taban Deng Gai ngo abe amusimbuye ku mwanya wa Visi Perezida mu gihe ataragaruka ariko Nyarji Roman, umuvugizi wa Riek Machar yavuze ko ibi abyamaganiye kure kuko ngo iki ni igikorwa kitemewe, cyakozwe mu ibanga ndetse ashinja abagikoze gushaka guhirika Visi Perezida Machar k’ubuyobozi.

Uyu muvugizi wa Machar akomeza avuga ko Riek Machar ashinja Taban Deng kugirana ibiganiro na Perezida Salva Kiir mu bwihisho, ibintu Machar afata nk’ubugambanyi.

Ibi bivuze ko abari bahanganye na Perezida Salva Kiir batangiye kwicamo ibice ndetse no kudahuza kuko Taban Deng washyizweho ngo asimbure Machar na we kuri ubu ahanganye na Machar kuko amushinja kumusimbura ku buryo butemewe kandi bwa rwihishwa.

Taban Deng Gai wabaye asimbuye Machar yari asanzwe ari umuhuza mukuru kuruhande rw’abatavuga rumwe na Perezida Salva Kiir, ari na yo mpamvu Machar amushinja kuba yaragiranye ibiganiro na Perezida mu rwihisho.

Abakurikiranira hafi ibya Politiki batangiye kuvuga ko ibyari bibi muri iki gihugu bishobora kuba bibi cyane kuko impande zitumvikana zikomeje kuba nyinshi.

Yisangize Inshuti.

Ibitekerezo

Tanga Igitekerezo