ICC yasabye itabwa muri yombi ry’umuhungu wa Muamar Gaddafi

Urukiko Mpuzamahanga mpanabyaha (ICC) rwategetse ko Saif Al Islam Gaddafi atabwa muri yombi nyuma y’iminsi itandatu arekuwe n’inyeshyamba zari zimumaranye imyaka itandatu.

Saif yarekuwe ku mbabazi yasabiwe n’imiryango irengera ikiremwamuntu, icyakora kuva yarekurwa ntabwo aho ari haramenyekana.

Uyu mugabo ICC imukurikiranyeho ibyaha byibasiye inyokomuntu mu mvururu zakuye se Muamar Gaddafi ku butegetsi mu mwaka wa 2011.

BBC yatangaje ko Saif ashobora kuba ari mu gace ka Tokruk mu burasirazuba bwa Libya.

Umushinjacyaha wa ICC, Fatou Bensouda yatangaje ko bari guhamagarira Leta zose zishobora kumubona cyane cyane Libya guhita zimuta muri yombi.

Irekurwa rya Saif hari abanya Libya cyane cyane abahaze akavuyo kibasiye igihugu kuva Gaddafi yakwicwa bamubona nk’umucunguzi n’ushobora gusubiza igihugu ku murongo, icyakora hari abandi biganjemo abari barakandamijwe n’ingoma ya se cyangwa ababuriye ababo mu mvururu zo muri 211 bamubona nk’umugizi wa nabi, ari nabo bashobora kwishimira ko afatwa na ICC.

Saif yafashwe mu Ugushyingo 2011 nyuma y’amezi atatu yihishe ubwo imvururu zakuye se ku butegetsi zakazaga umurego.

Yagize uruhare rukomeye mu kuzamura umubano wa Libya n’ibihugu by’Iburayi nyuma y’umwaka wa 2000 ubwo se yari ku butegetsi.

Yisangize Inshuti.

Ibitekerezo

Tanga Igitekerezo