HRW irashinja Imbonerakure n’abashinzwe umutekano mu Burundi gukora iyicarubozo

Bamwe mu baturage bagiye bakorerwa iyicarubozo ku mugaragaro

Umuryango mpuzamahanga urengera Uburenganzira bwa muntu "Human Right Watch (HRW) " urashinja Leta y’u Burundi guhohotera abaturage batavuga rumwe na yo aho bakorerwa iyica rubozo, abagore bagafatwa ku ngufu n’abashinzwe ubutasi ndetse n’urubyiruko rw’Imbonerakure.

Raporo yashyizwe ahagaragara na Human Right Watch kuri uyu wa 29 Kamena 2016 yagaragaje ko abashinzwe ubutasi mu Burundi bakorera iyicarubozo abaturage baba bakekwaho gukorana n’abadashyigikiye manda ya gatatu ya Perezida Petero Nkuruziza.

Bimwe mu bikorerwa abo baturage, harimo kubajojoberezaho ibikoresho bya palasitike batwitse, kuzirika imigozi ku myanya myibarukiro y’abagabo bakayikurura, kubakubita ibiboko ndetse no kubafatisha umurirro w’amashanyarazi.

Abakorerwa iri yicarubozo, ngo ni ababa bakekwaho gukorana n’inyeshyamba zirwanya Leta y’u Burundi guhisha intwaro maze bakabasaba kubyemera ku ngufu.

N’ubwo nta burenganzira Imbonerakure zifite bwo gufunga abantu, ngo zafashe abantu zibajyana kuri polisi babashinja gukorana n’abasirikare b’abarundi bavuga ko bari mu Rwanda, Imbonerakure ngo zibakorera ibirenze ibikorwa n’abashinzwe ubutasi.

Mu ntara zimwe na zimwe z’uburundi, abagize urubyiruko rw’ Imbonerakure bafite udutsiko dufata abagore ku ngufu babasanze mu ngo zabo mu gihe ngo abandi bafashwe n’abapolisi ku mupaka w’u Burundi ubwo bahungiraga muri Tanzaniya.

Human Right Watch ivuga ko kuva muri 2015 mu Burundi hatangira imvururu, gutoteza n’iyicarubozo byagiye bikwira mu gihugu hose nyamara Leta ntibyiteho.

Human Right Watch isaba ko hashyirwaho komisiyo yigenga kandi mpuzamahanga, igakora iperereza ryimbitse ku byaha by’iyicarubozo no gufata abagore ku ngufu byakozwe kuva muri 2015, iryo tsinda rikwiye kuba rifite ubunararibonye mu gukora iperereza ku byaha hakamenyakana ufite uruhare mu byaha bikomeye bikomeje kubera mu Burundi.

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo