Guverinoma y’u Burundi yafashe icyemezo cyo kuva muri ICC

1

Abagize guverinoma y’u Burundi baraye batoye umushinga w’itegeko ryo kuva mu rukiko mpuzamahanga mpanabyaha rwa ICC, nyuma y’amezi atandatu uru rukiko rutangaje ko rugiye gutangira iperereza ku byaha by’intambara byabereye muri iki gihugu

Uyu mushinga w’itegeko watowe n’abagize Guverinoma y’u Burundi mu nama yabaye kuri uyu wa 6 Ukwakira 2016.

Uyu mwanzuro u Burundi buwufashe mu gihe hari hashize amezi atandatu gusa umushinjacyaha w’urukiko rwa ICC Fatou Bensouda avuze ko uru rukiko rugomba gukurikirana ibyaha by’intambara byabaye mu Burundi kuva mu mwaka wa 2015 bigatuma abantu basaga 450 bahasiga ubuzima.

Izi mvururu zabaye ubwo Perezida Petero Nkurunziza yari amaze kwiyamamariza manda ya gatatu itaravuzweho rumwe n’abatavuga rumwe na Leta mu Burundi.

Ibiro ntaramakuru Reuters byatangaje ko iki cyemezo cyahawe abagize Inteko ishingamategeko y’u Burundi kugira ngo izagifatire umwanzuro wa nyuma.

Avuga ku ngaruka ibi bishobora kuzagira ku Burundi, Visi Perezida Gaston Sindimwo yavuze ko u Burundi bwiteguye kwirengera ingaruka ibi byazagira.

Yagize ati: “Twamaze kohereza uyu mushinga mu Nteko ishinga amategeko ngo iwemeze, twasanze ari ngombwa ko tuvamo kugira ngo turusheho kwigenga. Ibi bishobora gutuma tuba nkaho turi twenyine ariko kuri twe bibayeho nta kibazo kuko byibuze twaba turi mu bwigenge. Hari ibihugu byinshi bitasinye aya masezerano, ubu se byahawe akato?"

Yatanze urugero rw’ibihugu nka Leta zunze ubumwe za Amerika, Uburusiya, n’Ubushinwa nk’ibihugu bitasinye aya masezerano kandi ntibihabwe akato mu ruhando mpuzamahanga.

Urukiko rwa ICC rumaze iminsi rutavugwa neza n’abakuru b’ibihugu ndetse n’abandi bategetsi bakomeye muri Afurika barushinja kwibasira abanya-Afurika kurusha indi migabane.

Yisangize Inshuti.

Ibitekerezo 1

  1. Uburundi bwagize neza caaane ahubwo nibabukomere amashi abatwara uburundi berekanye ko arabagabo bukuri. Nibuka igihe abakuru bibihugu byafurika bari munama bose bidogera ICC ntanumwe yigeze avuga kuva muri ICC nubwambere bibaye ahubwo nibakomere amashi uburundinonese iyo ICC koidatumako amerika kubyo yirigwa arakorera ibindi bihugu kwisi? Bravo Peter nkurunzinza Bravo!

Tanga Igitekerezo