Warning: imagejpeg(local/cache-gd2/4d873e040c467dac618829e7cd150896.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
France:Amagambo akomeye hagati ya Macron na Le Pen mu kiganiro cyaciye kuri Televiziyo .|. Makuruki.rw | Amakuru Asesenguye!

France:Amagambo akomeye hagati ya Macron na Le Pen mu kiganiro cyaciye kuri Televiziyo

Kuri uyu wa Gatatu ku mugoroba nibwo habaye ikiganiro cya nyuma hagati ya Emmanuel Macron na Marine Le Pen bahatanira kuyobora Ubufaransa mu matora azaba kuri iki Cyumweru.

Ni ikiganiro cyari gikurikiwe n’abasaga miliyoni 16.5, cyaciye kuri televiziyo ya TF1 na France 2.

Ni ikiganiro cyaranzwe no kwibasirana hagati y’impande zombi, ndetse hari bimwe mu binyamakuru byazindutse byandika ko mu masaha abiri ikiganiro cyamaze, umwanya munini bawumaze batukana.

Ikiganiro cyarangiye Macron ari we utsinze nkuko ibitangazamakuru byabigaragaje ku majwi 58 %, bimwongerera n’amahirwe yo gutsinda amatora ku Cyumweru.

Inkuru bijyanye:UBUFARANSA:Itandukaniro rya Politiki ya Emmanuel Macron n’iya Marine Le Pen

Ku binyajye n’ubukungu no kugabanya ubushomeri, Macron yabwiye Le Pen ko gahunda ye ari iyo kubeshya gusa, ko nta bushobozi afite bwo gukora ibyo ashaka gusezeranya Abafaransa.

Le Pen yagize ati “Macron ni umukandida ushaka ko buri muntu yirwanaho, ushaka sosiyete ibabaye, y’ingome, ushaka ko abantu barwana.”Macron yahise amusubiza ati “Gahunda yawe ni ukubeshya gusa, nta kintu kiyirimo.”

Bakomeje baterana amagambo, Le Pen abwira Macron ko ku bijyanye n’inganda, Macron ashaka guteza imbere izisanzwe zikize, izigitangira zigafunga imiryango.Ati “Ushaka Ubufaransa buhatswe n’Umuryango w’Ubumwe bw’Uburayi, aho abanyamahanga aribo badufiteho ijambo…nta rukundo rw’igihugu ufite, ntutekereza ku nyungu z’Abafaransa.”

Le Pen yageze aho abwira Macron ko gahunda ye ku bijyanye n’inganda igamije kugurisha Ubufaransa, mu gihe iye bwite igamije guha Abafaransa ubushobozi bwo kwitunga.

Bageze ku ngingo irebana n’umutekano ndetse n’iterabwoba, Le Pen avuga ko abafite ingengabitekerezo y’iterabwoba n’abafite aho bahuriye nayo badakwiye kuba mu Bufaransa, ibintu Macron adashyigikiye.Le Pen yakomeje avuga ko Macron kuba adashyigikiye iyirukanwa ry’abimukira ubwo na we ashyigikiye iterabwoba.

Macron yasubije ko adashyigikye iterabwoba, ndetse ngo mu migambi ye ya mbere azagaragaza akigera ku butegetsi harimo no kuriwanya, icyakora yavuze ko atazabikora nka Marine Le Pen, ngo kuko abikoze nka we yaba ashaka guteza intambara mu baturage.

Ati “Icyo baduteze (abaterabwoba) imitego baduteze ni iriya ya Le Pen, yo guteza intambara mu baturage.”

Babajijwe uko babona Umurango w’Ubumwe bw’Uburayi, Le Pen yagize ati “ndifuza ubufatanye bw’ibihugu by’Uburayi ariko buri gihugu kigenga, gifite ubudahangarwa bwacyo.Ndashaka kubanza kwinjira mu biganiro kugirango dushake ubwo bumwe bw’Abanyaburayi, ntegura inama y’abakuru b’ibihugu na za guverinoma.Nyuma nzategura referendum y’Abafaransa, sinshaka ko Uburayi buguma mu biganza by’abayoboye Umuryango w’Ubumwe bw’Uburayi.”

Le Pen yakomeje avuga ko afite umugambi wo gukuraho ifaranga ry’iri Euro mu Bufaransa, hakajya hakoreshwa ifaranga ry’Abafaransa kugirango rigire agaciro mu ruhando mpuzamahanga.

Macron yahise amusubiza ko atamushyigikiye na gato mu migambi ye ati “ibyo muvuga nta kigenda…ibya Le Pen, ni umushinga uganisha igihugu ahabi, ndi umukandida w’Ubufaransa bukomeye mu Burayi burinzwe.Sinshaka ko abaturage bacu babura akazi n’umusaruro kubera kuvanaho amayero, nibyo Le Pen avuga.”

“Sinshaka gukunda igihugu nk’uko ubikora.Kwirwanaho no kuba nyamwigendaho nibyo ushaka.Intambara hagati yacu twarazirenze.”

Macron yavuze ko kuvanaho ifaranga ry’iri Euro bivuze ko sosiyete nini mpuzamahanga ziri mu Bufaransa zizajya zijya kwishyura abakozi bazo zikabishyura mu bwoko bubiri bw’amafaranga, ibintu asanga byaba ari bibi cyangwa bigatuma izo sosiyete zima akazi Abafaransa.

Yisangize Inshuti.

Ibitekerezo

Tanga Igitekerezo