Flynn wirukanywe na Obama, yeguye ku bujyanama bwa bwa Donald Trump

Michael Flynn, wari umujyanama wa Perezida Donald Trump yeguye ku mirimo ye nyuma y’inkuru zasohotse zigaragaza umubano afitanye n’u Burusiya ndetse na nyuma y’uko havumbuwe ibiganiro byihariye yagiranye na bamwe mu badipolomate babwo kuri telefone.

Flynn wari umujyanama mu by’umutekano w’igihugu n’imibanire mpuzamahanga, ashinjwa kuba yaraganiriye ibijyanye n’ibihano Amerika yafatiye u Burusiya kandi akabikora ataragenwa kuba umuyobozi.

Yigeze no kuba ushinzwe iby’ubutasi ku mutekano ku buyobozi bwa Obama ariko aza kwirukanwa.

Amategeko ya Amerika ntabwo yemerera umuturage kuganira n’abadipolomate b’ibindi b’ibihugu ku bijyanye n’umubano wabyo na Amerika.

Mu binyamakuru byo muri Amerika haherutse gusohoka inkuru zivuga ko Flynn ashobora kuzira icyo kiganiro yagiranye na Ambasaderi w’u Burusiya.

Mu ibaruwa yo kwegura, Flynn yavuze ko yatanze amakuru atuzuye kuri Visi Perezida Mike Pince ku bijyanye n’ikiganiro yagiranye na Ambasaderi w’u Burusiya Sergei Kislyak, kandi ko yasabye imbabazi Perezida Trump na Pince bakazimuha.

Ikinyamakuru Washington Post cyatangaje ko amakuru y’ibyo Flynn yaganiriye na Ambasaderi w’u Burusiya yatangajwe na Sally Yates, wari intumwa nkuru ya Leta akaza kwirukanwa na Trump kubera kutumvikana ku cyemezo cyo kwirukana abimukira.

Kuva Trump yashyiraho Flynn nk’umujyanama we, yibajijweho cyane uburyo amuhisemo n’uburyo yakunze kugaragaza ubucuti bwihariye afitanye n’abarusiya.

Flynn mu mwaka wa 2015 yagaragaye yicaye iruhande rwa Perezida Vladimir Putin w’u Burusiya.Yanagaragaye kandi aririmba indirimbo zitavuga rumwe na Hillary Clinton wahatanaga na Trump, ubwo hagaragazwaga ko Clinton yakoresheje email z’akazi mu nyungu ze bwite.

BBC yatangaje ko Flynn yaganiriye na Ambasaderi Sergei inshuro nyinshi mu Ukuboza umwaka ushize.

Aha Flynn yasangiraga na Perezida Putin mu Ukuboza 2015

Yisangize Inshuti.

Ibitekerezo

Tanga Igitekerezo