Donald Trump yasabye imbabazi ku magambo ateye isoni yavuze ku bagore

Umukandida uhagarariye abarepubulike mu matora ya Perezida muri Leta Zunze Ubumwe za Amerika Donald Trump, yasabye imbabazi ku magambo aherutse kugaragara mu mashusho, aho yavugaga ko abagore ubakoraho icyo ushaka iyo uri icyamamare.

Ayo mashusho yahishuwe n’Ikinyamakuru Washington Post kuri uyu wa Gatanu.Yafashwe mu mwaka wa 2005 ubwo Trump yaganiraga na Billy Bush, mubyara wa George Bush mu kiganiro cyagombaga guca kuri televiziyo.

Icyo gihe Trump yavuze ko iyo uri icyamamare abagore bose beza ubakorera icyo ushatse. Yagize ati “Njye nkururwa byihuse n’abagore beza.Mpita ntangira kubasoma, biba bimeze nka rukuruzi.Rwose urabasoma, njye sinjya ntegereza…kandi iyo uri icyamamare barakureka ukabikora.Icyo aricyo cyose wagikora.”

Yakomeje agira ati “N’igitsina cyabo ugikoraho, ntacyo utakora.”

Trump kandi yakomeje abwira Bush ko hari umugore yigeze gutereta kandi afite undi mugabo kugeze ubwo baryamanye. Ati “Naramushatse arananira ariko naragerageje turaryamana.Yari afite umugabo, namukoze ibyo nshaka wagirango yari indaya…kandi yari afite umugabo.”

Aya magambo yanenzwe bikomeye n’abademokarate, ndetse Hillary Clinton ubahagarariye mu matora ya Perezida avuga ko Trump bigaragara ko atashobora kuba Perezida. Yagize ati “Ibi biteye ubwoba, Ntitwakwemera ko uyu mugabo yatubera Perezida.”

Trump mu gusaba imbabazi yavuze ko icyo kiganiro yagikoze kera kandi ko cyari mu ibanga.

Trump yakomeje avuga ko abamuzi bazi ko atari uko ateye. Ati “Umuntu wese unzi azi ko aya magambo atagaragaza ishusho nyayo yanjye.Narayavuze, ni amafuti ariko ndasaba imbabazi.Sinigeze mvuga ko ndi umuntu mwiza ijana ku ijana ariko sinigeze nanigaragaza uko ntari, navuze ibintu nicuza kandi amagambo yasohowe uyu munsi ni amwe muri ayo mabi navuze.”

Ariko Trump yavuze ko mu kiganiro mpaka afitanye na Hillary Clinton kuri iki Cyumweru, azagaragaza n’uburyo Bill Clinton, umugabo wa Hillary nawe yakoreraga abagore ibya mfura mbi.

Trump mu kwiyamamaza kwe yakunze kugorwa n’imyitwarire yagiye agira mu myaka yashize ku bagore.Mu minsi ishize Hillary yashinje Trump gutuka umukobwa wari watsinze mu marushanwa y’ubwiza, avuga ko asa n’ingurube ndetse ari nk’umukozi wo mu rugo.

Yisangize Inshuti.

Ibitekerezo

Tanga Igitekerezo