Trump arashinja Obama na Clinton gushinga umutwe wa Islamic State

Umu Republicais Donald Trump uhanganye n’umu Democrates Hillary Clinton mu matora ya Perezida wa Leta zunze ubumwe za Amerika yashinjije Perezida w’iki gihugu Barack Obama gufatanya n’uwo bahanganye Hillary Clinton gushinga umutwe w’iterabwoba ugendera ku mahame y’idini ya Islam, ‘Islamic State’.

Ibi Trump yabivugiye mu nama yabaye kuri uyu wa 10 Kanama 2016, i Fort Lauderdale muri Leta ya Florida.

Uyu muherwe Donald Trump yabanje gushinja Perezida Barack Obama guteza imvururu mu Burasirazuba bw’Isi, yongeraho ko Islamic State ikora ibikorwa by’ubwiyahuzi igamije gushimisha Obama.

Trump yagize ati : “Obama ni we washinze IS, ni we wayishinze"

Mu gushimangira ko Obama yafatanyije na Clinton gushinga Islamic State yongeyeho ati: "Navuga ko uwo bafatanyije ari uriya murwayi Hillary Clinton.”

Hategerejwe kumva icyo Perezida Obama cyangwa Clinton baza gusubiza Trump dore ko kugeza ubu muri bombi nta wagize icyo avuga kuri aya magambo.

Trump yagiye agaragaza kwibasira Clinton mu mbwirwaruhame ze amuvugaho amagambo yo kumusebya ndetse no kumutuka ku karubanda.

Aljazeera itangaza ko Trump yavuze ko kuba Obama yarafashe icyemezo cyo gukura ingabo za Amerika muri Iraq ubwo yari mu ntambara ari byo byabaye nyirabayazana w’ivuka ry’imitwe y’iterabwoba na Islamic State irimo kandi akavuga ko na Hillary Clinton bafatanyje kuko yahoze ari umunyamabanga wa Leta zunze ubumwe za Amerika.
.
Umutwe wa IS ukomoka mu mvururu za Afganistan na Irak muri 2003, ariko wagize ingufu muri 2011 ingabo za Amerika zimaze kuva muri iki gihugu.

Umutwe w’abarwanyi wa Islamic State Trump ashinja aba bantu gushinga, watangiye ugizwe n’Abanya-Iraq ukaba uvuga ko urwanira gushinga Leta igendera ku mahame ya Islam no guhindura abatuye aho wigaruriye Abayisilamu.

Yisangize Inshuti.

Ibitekerezo

Tanga Igitekerezo