Bwa mbere, uwahoze ayoboye umutwe wa kisilamu agiye kuburanishwa na ICC

Kuri uyu wa Mbere, ku rukiko mpuzamahanga mpanabyaha i Lahaye mu Buholandi bitaganyijwe ko hatangira urubanza rwa Ahmad al-Faqi al-Mahdi ukekwaho gusenya agace ndangamateka ka Timbuktu muri Mali.

Mahdi araba abaye umurwanyi wa mbere wa kisilamu ubashije kugezwa imbere ya ICC.

Agace ka Timbuktu kasenywe n’abarwanyi b’umutwe wa Ansar Dine wari uyobowe na Mahdi mu mwaka wa 2012.

Icyo gihe hasenywe inyubako ntagatifu zirimo imisigiti ndetse n’imva z’amateka byose bigera ku icyenda.

Ni ubwa mbere muri ICC haraba haburanishijwe urubanza rwo kwangiza ahantu ndangamateka.

BBC yatangaje ko Mahdi ashobora kwemera ibyo aregwa, bikaba bishobora gutuma n’urwo rubanza rumara igihe gito kitarenze icyumweru kimwe.

Mahdi yafashwe na leta ya Nigeria ku mpapuro zo kumuta muri yombi zari zatanzwe na ICC.

Timbuktu ni agace kazwi cyane mu mateka, kakaba ari kamwe mu twa mbere twafashije idini ya isilamu gukwirakwizwa muri Afurika.

Niko gace kigishirizwagamo inyigisho za isilamu mu myaka ya 1329 , gafite umwihariko wo kuba kabitse inyubako zigishirizwagamo icyo gihe, imisigiti, ibitabo byakoreshwaga ndetse n’imva za bamwe mu bantu bakomeye bagiy bahayobora.

Mu mwaka wa 1988 nibwo ishami ry’umuryango w’abibumbye ryita ku burezi n’umuco (UNESCO) ryagahagize agace ndangamurage ku isi.
Bimwe mu biranga amateka ya Timbuktu byarasenywe muri 2012

Yisangize Inshuti.

Ibitekerezo

Tanga Igitekerezo