Willy Nyamitwe, umujyanama wa Perezida Nkurunziza yagabweho igitero

Umujyanama wa Perezida w’u Burundi, Willy Nyamitwe, yagabweho igitero n’abantu bataramenyekana baramukomeretsa ariko umwe mu bamurinda ahasiga ubuzima undi na we arakomereka.

Aya makuru yemejwe na Willy Nyamitwe ubwe abinyujije ku rukuta rwe rwa Twitter ashimira abamwihanganishije anatangaza ko ababajwe n’umwe mu bapolisi witwa Gasongo wahasize ubuzima.

Mu butumwa yanyujije kuri Twitter, Nyamitwe yagize ati: Ndashimira abakomeje kunyihanganisha, meze neza ariko mbabajwe n’urupfu rw’umupolisi w’inshuti yanjye witwa Gasongo wapfuye.

Willy Nyamitwe ni umujyanama mu biro bya Perezida w’u Burundi Pierre Nkurunziza mu bijyanye n’itangazamakuru n’itumanaho.

Aba bagizi ba nabi bataramenyekana ngo bashatse kumurasa ageze hafi yo mu rugo iwe i Bujumbura. Nyamitwe ngo yatewe nka nyuma y’isaha imwe avuye ku kazi ku mugoroba wo kuri uyu wa mbere.

Nyamitwe ni umwe mu banyepolitiki bazwi mu Burundi, biravugwa ko nubwo atapfuye yakomeretse ku kuboko ndetse n’uwo mupolisi wapfuye akaba yari umwe muri babiri bari bamurinze undi umwe na we akaba yakomeretse.

Kuri ubu ngo Nyamitwe arimo gukurikiranwa n’abaganga.

Yisangize Inshuti.

Ibitekerezo

Tanga Igitekerezo