Burundi: Polisi yahakanye ko umunyamakuru Bigirimana ari mu mirambo iherutse gusangwa mu mugezi

Muri iyi mirambo ibiri yakuwe mu mugezi ngo nta uwa Bigirimana urimo

Polisi yo mu gihugu cy’u Burundi iratangaza ko ikomeje gukora iperereza ku irengero ry’umunyamakuru Jean Bigirimana wabuze tariki ya 22 Nyakanga uyu mwaka, ariko yemeza ko ibyo bamaze kumenya ari uko mu mirambo ibiri yatoraguwe mu mugezi wa Mubarazi mu Ntara ya Muramvya uwo munyamakuru atarimo nkuko byagiye bivugwa.

Umuvugizi w’igipolisi cy’u Burundi Pierre Nkurikiye yatangaje ko iperereza kuri iyo mirambo ngo rikomeje gukorwa n’urukiko ruherereye mu ntara ya Muramvya ari naho iyi mirambo yatoraguwe.

Abapolisi bo mu ishami rishinzwe gukumira impanuka nibo bakuye iyo mirambo y’abantu bataramenyekana mu mugezi wa Mubarazi bayijyana mu mu buruhukiro bw’Ibitaro bya Muramvya.

Umwe muri iyo mirambo yakuwe mu mazi ntiwari ufite umutwe, bikaba ngo byaragaragaraga ko mbere y’uko uwo muntu atabwa mu mazi yabanje gucibwa umutwe.Undi murambo nawo wo wari uboshye amaboko ndetse banawuziritseho agafuka karimo amabuye.

Iyi mirambo ngo yabonywe n’abanyamakuru bagenzi ba Jean Bigirimana bari bari gushakisha ko bamubona mu gace yaburiyemo, ndetse nyuma bakaba ari bwo bahise batabaza inzego z’umutekano ngo zikure iyo mirambo mu mazi.

Jean BIGIRIMANA wari usanzwe ukorera ikinyamakuru IWACU, yaburiwe irengero tariki 22 Nyakanga 2016, aho bivugwa ko yatwawe n’inzego zishinzwe iperereza muri iki gihugu ndetse ngo zikamujyana ahantu hatazwi.

Uyu munyamakuru ngo yaba yari amaze igihe agendwaho cyane ngo akurikiranyweho inkuru yatangaje ku by’umubano w’u Rwanda n’u Burundi ndetse n’indi nkuru ngo yavugaga ku buzima bw’abanyamakuru bari mu buhungiro.


Umunyamakuru Jean Bigirimana waburiwe irengero I Burundi

Yisangize Inshuti.

Ibitekerezo

Tanga Igitekerezo