Boko Haram hari icyo yasabye Nigeria ngo irekure abakobwa yafashe

Abubakar Shekau uyobora Boko Haram

Umuyobozi wa Boko Haram, Abubakar Shekau yasabye Leta ya Nigeria gufungura abarwanyi bayo yafashe, maze nabo bakabaha abakobwa bashimuse mu mwaka wa 2014.

Mu Cyumweru gishize mu nama ya 71 y’Umuryango w’Abibumbye, Perezida wa Nigeria Muhammadu Buhari yasabye Loni gukora ibishoboka byose ikinjira mu biganiro na Boko Haram,ikaba yarekura abakobwa basaga 200 bashimuswe muri Mata 2014 ku ishuri rya Chibok.

Mu mashusho yashyizwe hanze kuri uyu wa Gatandatu, Shekau yavuze ko Leta ya Nigeria bazayisubiza abo bakobwa, igihe cyose izemerera kurekura abavandimwe bayo bafashwe.

Yagize ati “Ntabwo tuzabagarurira abo bakobwa, niba mushaka ko tubagarura, muduhe abavandimwe bacu.”

Buhari yari yatangaje ko Loni niramuka yinjiye mu biganiro na Boko Haram, Leta ya Nigeria yiteguye kubasubiza imfungwa zayo yafashe.

Shekau kandi yanyomoje amakuru yari yatangajwe n’ingabo za Nigeria muri Kanama uyu mwaka, aho zavugaga ko zamwishe cyangwa zamukomerekeje mu bitero by’indege bagabye mu ishyamba rya Sambisa, aho bikekwa ko hari ibirindiro bya Boko Haram.

Shekau yagize ati “Ndiho kandi meze neza.Mugomba kumenya ko iyo iminsi yo kubaho kwanjye iba yararangiye, ntimwari kuba mumbona aha.Hari abantu benshi babaho kandi hari abifuza ko bapfa, kimwe nuko hari abapfa kandi bakabaye bariho.”

Leta ya Nigeria, Niger na Tchad zakunze kugaba ibitero kuri Boko Haram mu rwego rwo kuyihashya no kuyica intege.

Mu mashusho y’iminota 30 Shekau yagaragayemo, yavuze ko nta wapfa kubarimbura ngo kuko Imana bakorera irenze indege bakoresha babarwanya.

Ati “Ntimwibwire ko mwatubasha n’izo ndege zanyu z’intambara.Allah dusenga atuye hejuru y’izo ndege kandi mwibwira ko mwadutsinda muzi ko ari Allah dusenga.”

Boko Haram yakunze kuvugwamo gucikamo ibice.Mu ntangiriro za Kanama Leta ya Kisilamu ikorana bya hafi na Boko Haram yatangaje ko Shekau yasimbujwe Abou Mosab Al Barnaoui, gusa Shekau yahise abinyomoza, avuga ko abo ari abashaka kumugambanira.

Yisangize Inshuti.

Ibitekerezo

Tanga Igitekerezo