Amerika yaburiye abaturage bayo bari muri Kenya kubera impungenge z’umutekano wabo

Leta zunze ubumwe za Amerika zaburiye abanya-Amerika bari n’abashaka kujya mu gihugu cya Kenya ko bakwiye kuba maso kubw’umutekano wabo ushobora guhungabanywa n’imvururu zishobora kuzakurikira amatora ya Perezida ateganyijwe gusubirwamo kuwa 17 Ukwakira.

Izi mbuzi zije nyuma y’icyumweru kimwe gusa Amerika iburiye abaturage bayo ko mu gihe bari muri Kenya bagomba kwitondera umutekano wabo ivuga ko Al-Shabaab ishobora kongera kugaba ibitero bikomeye muri Kenya.

Kuri uyu wa gatatu, Amerika yongeye gutangaza ko hashobora kuba imyigaragambyo mu bihe byo gusubiramo amatora, itangazo rya Amerika rivuga ko bishoboka ko no mu bikorwa biteganyijwe kuba mu mahoro hashobora kuvukamo ukutumvika ku mpande z’abahanganye mu matora bigatuma havuka imvururu zigahungabanya umutekano.

Amerika ivuga ko nta gihamya itanga yuko abanya-Amerika ari bo bazibandwaho mu mvururu zishobora kuba ariko ikabasaba kuba maso mu gihe bari muri Kenya muri ibi bihe by’amatora bityo hari uduce tumwe na tumwe babujijwe kujya berekezamo.

Iri tangazo rya Amerika ryaje mu gihe abatavuga rumwe na Leta bakomeza gusaba ko abayobozi ba komisiyo y’Amatora bahindurwa mbere yo kuyasubiramo kugirango batazongera gukora amakosa yatumye amatora asubirwamo.

Aba bayobozi ba komisiyo y’amatora ya Kenya baherutse kuvuga ko batigeze bamenya amakosa bakoze yatumye amatora asubirwamo, ibintu byerekana ko ibyo bakosheje bashobora kongera kubisubira.

Icyakora Kenyatta we agenda yumvikana avuga ko azakomeza gusigasira umutekano kugirango ubukungu bw’abanya-Kenya butazahunganywa n’umutekano mucye ushingiye ku mvururu zishobora gukurikira amatora.

Yisangize Inshuti.

Ibitekerezo

Tanga Igitekerezo