America yohereje amato atatu atwaye indege z’intambara mu Nyanja ya Pacific, intambara iratutumba

Perezida wa America, Donald Trump yohereje amato atatu atwaye indege z’intambara mu Nyanja ya Pacific mu rwego rwo gufasha ingabo za America kwitoza ku rwego rwo hejuru, ku buryo isaha iyo ari yo yose bajya mu ntambara.

Uku koherezwa kw’aya mato atwaye indege z’intambara mu Nyanja ya Pacific, gushobora kuba intandaro y’intambara hagati ya Leta Zunze ubumwe za America na Korea ya ruguru nyuma yo guhangana ku magambo kumaze igihe kugaragara hagati ya Trump na Kim Jong un wa Korea ya ruguru.

Nkuko CNN ikomeza ibitangaza, ngo America iri gutegura intambara ku bufatanye n’igihugu cya Korea y’Epfo ndetse na Australia.

Trump akomeje kugaragaza cyane ko yiteguye intambara ku buryo bukomeye , dore ko ubwo aheruka mu Buyapani yasabye ko iki gihugu kizarasa indege y’intambara izagerageza kunyuzwa mu kirere cy’iki gihugu iturutse muri Korea ya Ruguru.

Ubu bwato bwoherejwe mu gihe Trump ari kwitegura kujya guhura na Perezida wa Korea y’Epfo, Moon-Jae-In ndetse akanahura n’abasirikare ba Leta zunze Ubumwe za America bari muri iki gihugu.

Trump uvugwaho gukoresha amagambo akakaye cyane, yavuze ko abamubanjirije mu myaka 20 ishize bagerageje gukoresha imvugo yoroshye bigatuma basiga habi igihugu, ariyo mpamvu atagomba kwihanganira umuntu wese ugerageza kubangamira ubusugire n’ubudahangarwa bwa Leta Zunze ubumwe za America.

Alexis Bikorimana

Yisangize Inshuti.

Ibitekerezo

Tanga Igitekerezo