Abasaga 20 baguye mu mirwano yongeye kwaduka muri Centrafrika

Intumwa z’umuryango w’abibumbye ziri mu butumwa bwo kugarura amahoro muri Centrafrika zatangaje ko imirwano yongeye kwaduka hagati y’umutwe wa Seleka n’uwa Anti-Balaka yaguyemo abantu basaga 20.

Iyi mirwano hagati ya Seleka na Anti - Balaka yongeye kwaduka kuva ku mugoroba wo ku wa gatanu tariki 16 Nzeri 2016.

Izi ngabo zikomeza zivuga ko zahise zitabara kugirango zihagarike ubwo bwicanyi bwaberaga mu mujyi wa Kaga Bandoro uherereye mu majyaruguru y’igihugu .

Izi ngabo zatangaje ko iyi mirwano yaguyemo abantu 20 ariko umuvugizi w’ibiro bya Perezida muri iki gihugu yatangaje ko abapfuye bagera kuri 26.

Uyu muvugizi yatangaje ko abarwanyi bo mu mutwe wa Kisilamu wa Seleka bagiye urugo ku rundi bica abantu b’inzirakarengane.

Igihugu cya Centrafrica kiri mu bihe by’umutekano muke kuva muri 2013 ubwo umutwe wa Seleka uvuga ko ushingiye ku idini ya Islam wafataga igihugu ugahirika Francois Bozize Perezida w’umukirisitu wari uri ku butegetsi.

Icyo gihe umutwe wa anti-Balaka w’abakirisitu ni bwo wahise ufata iya mbere utangira guhangana na Seleka y’abasilamu.

Abantu ibihumbi barishwe kubera izo mvururu zishingiye ku madini ndetse abandi amagana n’amagana bakurwa mu byabo barahunga kuva muri 2013.

Ingabo z’umuryango w’abibumbye zigera ku bihumbi 11 (11.000) zoherejwe muri iki gihugu mu rwego rwo kugarura amahoro mu butumwa bwiswe MINUSCA ariko n’ubu abantu baracyapfa.

Kuri ubu iki gihugu kiyobowe na Faustin Archange Touadera kuva muri Werurwe 2016 agatsinda ku majwi 62.71% atsinze Anicet-Georges Dologuele bari bahanganye wagize amajwi 37.29 akemera insinzwi ataburanye.

Ingabo za LONI ziri mu butumwa bwo kugarura amahoro MINUSCA zivuga ko zitazihanganiora abashaka guhungabanya amahoro n’umutekanop byari amaze kugerwaho nyuma y’amatora.

U Rwanda ruri mu bihugu byohereje ingabo mu butumwa bwa MINUSCA aho rufiteyo umutwe w’abasirikare ukora ibikorwa birimo kurinda Umukuru w’Igihugu n’abandi bayobozi bakuru, bakanacunga umutekano w’izindi nzego za Leta zikomeye.

Yisangize Inshuti.

Ibitekerezo

Tanga Igitekerezo