Abarenga 100 bamaze guhitanwa n’imirwano ikomeye

Intambara hagati ya Salva Kiir na Riek Machar zatangiye kuva 2013

Mu mirwano imaze iminsi ine ibera muri Sudan y’Epfo yashyamiranyije abashyigikiye Perezida Salva Kiir ndetse n’abashyigikiye Riek Machar utavuga rumwe n’ubutegetsi imaze guhitana abarenga 100.

Amakuru aturuka ku banyamakuru ndetse n’abaganga bo muri iki gihugu aremeza ko abantu basaga ijana ari bo bamaze gusiga ubuzima muri iyi mishyamirano yatangiye kuwa kane tariki 7 Nyakanga 2016.

Iyi mirwano ngo yakajije umurego cyane kuwa gatanu aho abasirikare ku mpande zombi bahanganye bikomeye.

Nyirabayazana w’iyi mirwano ngo abasirikare barinda Perezida Kiir ndetse n’abarinda Machar kuko ngo ari bo babanje kurasanira hafi y’ingoro ya Perezida, iyi mirwano hagati y’aba basirikare ngo yamaze isaha irenga yaje gukwirakwira mu gihugu hose bituma haba imirwano ikomeye ishyamiranyije impande zombi.

Iyi mirwano ibaye nyuma y’uko impande zombi zari zarasinyanye amasezerano y’amahoro nyuma y’intambara yabashyamiranyije igahitana ibihumbi byinshi by’abaturage abandi benshi bagakurwa mu byabo.

Intambara zagiye ziba muri iki gihugu kuva muri 2013 zatumye hagaragara ubukene bukabije ku buryo Perezida yategetse ko nta minsi mikuru ya Leta izongera kwizihizwa muri iki gihugu.

Yisangize Inshuti.

Ibitekerezo

Tanga Igitekerezo