Abakozi ba EAC bajyanye umunyamabanga wayo mu nkiko kubw’icyemezo yabafatiye

Abakozi batandatu bakora mu bunyamabanga bw’Umuryango wa Afurika y’Iburasirazuba (EAC), bagejeje ikirego mu rukiko rw’uyu muryango (EACJ), ngo barenganurwe ku cyemezo bafatiwe cyo gusesa amasezerano yabo y’akazi ku buryo bavuga ko bunyuranyije n’amategeko

Abakozi batanze ikirego ni abakorana n’Umuryango w’Afurika Yunze Ubumwe (AU) mu kurinda amahoro n’umutekano (African Peace and Security Architecture Project, (APSA).

Aba bakozi berekeje mu nkiko nyuma y’aho Kuwa 17 Kamena 2016, Umunyamabanga mukuru wa EAC, Dr Libérat Mfumukeko, yabandikiye abamenyesha ko amasezerano yabo y’akazi yarangiye ndetse abaha amezi atatu gusa ngo babe bahagaritse imirimo yabo.

Ikinyamakuru The Eastafrican cyanditse ko Dr Mfumukeko yafashe iki cyemezo ashingiye ku kuba inkunga yafashaga aba bakozi mu mirimo yabo yaraturukaga mu muryango w’ubumwe bw’Uburayi (EU) uyinyujije mu muryango w’ubumwe bw’Afurika (AU) kandi kuri ubu ngo iyo nkunga ikaba itagitangwa.

Ibaruwa ihagarika aba bakozi yagiraga iti :“Dushingiye ku kuba EAC nta nkunga ifite yo gufasha imishinga ya APSA, turabamenyesha ko mufite amezi atatu ngo amasezerano y’akazi kanyu arangire duhereye kuwa 20 Kamena 2016.”

Nyuma yo kubona iyi baruwa, aba bakozi bavuze ko iki cyemezo bafatiwe kitubahirije amatgeko n’amabwiriza ya EAC, bityo bahita bandika basaba ubunyamabanga bwa EAC kugisubiramo kuko ngo izo nkunga zifasha ibikorwa byabo ziri hafi kuboneka.

Mu ibaruwa banditse ku wa 18 Nyakanga, aba bakozi bavuze ko itinda ry’inkunga yabo ryaturutse ku kuba EU yarashyizeho amabwiriza mashya, bityo kuri bo ngo basanga EAC ikwiye gufasha ibikorwa byabo aho kubirukana kuko ngo iyo nkunga niza RAC izishyurwa amafaranga yatanze mu kubafasha.

Ibaruwa y’ubusabe bwabo yagiraga iti:“ biteganyijwe ko mu minsi mike AU izasura imiryango y’Ubukungu yo muri aka karere, mu rwego rwo gusinya amasezerano y’ubufatanye [....] amafaranga azaba yageze kuri konti ya EAC kuwa 23 Nyakanga 2016 "
Iyi baruwa yakomezaga ivuga ko amafaranga EAC yakoresheje itera inkunga ibikorwa by’aba bakozi izayasubizwa ndetse hagasigara azabahemba mu mezi yose asigaye y’uyu mwaka. Bityo ngo basanga kubirukana mu kazi byaba ari ukubarenganya.

Kuwa 14 Nzeli 2016 ni bwo urukiko ruzumva ibisobanuro ku busabe bw’aba bakozi bwo gukuraho icyemezo cya Dr.Mfumukeko, nkuko byatangajwe n’mwanditsi w’urukiko rwa EACJ, Yufnalis Okubo.

Yisangize Inshuti.

Ibitekerezo

Tanga Igitekerezo