Abafata imiti igabanya ubukana bwa SIDA bikubye kabiri mu myaka 5 ishize, abibasiwe ni abangavu

Umuryango w’abibumbye uratangaza ko ubwiyongere bw’ubwandu bw’agakoko gatera SIDA bukabije nyuma yo kubona ko umubare w’abantu banduye agakoko gatera SIDA bafata imiti igabanya ubukana wikubye kabiri mu myaka itanu ishize

Raporo nshya y’ishami ry’umuryango w’abibumbye rishinzwe kurwanya SIDA yasohotse kuwa 21 Ugushyingo 2016 igaragaza ko ubwandu bw’agakoko gatera SIDA bwiyongera ku buryo budasanzwe ariko cyane cyane ku bakobwa bakiri bato bo mugabane wa Afurika.

Iyi Raporo iragaragaza ko abibasiwe cyane ari urubyiruko ariko cyane cyane abangavu ndetse ikavuga ko guhangana no kugabanya ubwandu bushya bigoranye cyane muri iyi minsi.

Muri 2015, habarurwaga abantu bagera ku 7,500 b’urubyiruko rw’abakobwa banduraga agakoko gatera SIDA mu cyumweru kimwe gusa ku isi hose ariko bakaba bari biganjemo abo mu majyepfo y’Afurika.

Nanone kandi ubu bushakashatsi bwerekanye ko mu majyaruguru ya Afurika abakobwa bari hagati y’imyaka 15 na 19 bari bihariye 90% by’abafite ubwandu bushya bwa SIDA mu bantu bose bari hagati y’imyaka 10 na 19.

Muri Afurika y’Iburengerazuba 74% by’ubwandu bushya bugaragara mu bakobwa bakiri bato (abangavu).

Ibi ni ibyerekana ko abakobwa bari mu kigero cy’ubwangavu ari bo bandura SIDA cyane kurusha abandi muri Afurika.

Michel Sidibe uyobora ishami ry’umuryango w’abibumbye rishinzwe kurwanya SIDA yabwiye Aljazeera ko bahangayikishijwe no kuba abakobwa bakiri bato ari bo bibasiwe cyane kurusha abandi.

Ati: " Abangavu bibasiwe cyane n’ubwandu bwa Virusi itera SIDA, kandi banatinya kwipimisha kandi bafite ubumenyi buke mu gufata imiti igabanya ubukana, isi irimo kubura abakobwa bakiri bato, dukeneye gukora byinshi"

Ubu bushakashatsi ngo bwerekanye ko ubu bwandu abangavu babukura ku bagabo bakuze baba bamaze igihe babufite bakabukwirakwiza mu dukobwa tukiri duto, bwerekanye kandi ko abagabo batita ku kwipimisha SIDA no gufata imiti igabanya ubukana ugereranyije n’abagore.

Abasaga miliyoni 18 bafata imiti igabanya ubukana bwa SIDA ku isi hose. Mu mwaka ushize Miliyoni 5.8 bafataga imiti igabanya ubukana bari abantu bari hejuru y’imyaka 50, umubare LONI ivuga ko ari utari warigeze kubaho mbere hose.

Uretse kuba bandura Virusi ya SIDA bakiri bato, hari ibindi bibazo byugarije abangavu birimo: gutwita imburagihe, kubaka ingo bakiri bato, ibibazo by’ubuzima bw’imyororokere, guhagarika amashuri, ubukene bukabije, ihohoterwa, n’ibindi.

Yisangize Inshuti.

Ibitekerezo

Tanga Igitekerezo