Uwasuye urwibutso ntawamujya mu matwi avuga ko Jenoside itabaye-Minisitiri w’Intebe Murekezi

Minisitiri w’Intebe Anastase Murekezi yavuze ko inzibutso za Jenoside ari ibihamya bikomeye by’itegurwa n’ishyirwa mu bikorwa bya Jenoside yakorewe Abatutsi, kandi ko ntawe ushobora kuzisura ngo atahe ayihakana cyangwa ayita andi mazina.

Murekezi yabitangaje kuri uyu wa Gatatu mu muhango wo kwibuka inzirakarengane za Jenoside yakorewe Abatutsi ziciwe i Murambi, zikaba zishyinguye mu rwibusto rwa Jenoside rwa Murambi mu Karere ka Nyamagabe.

Yavuze ko hanze aha hari abagipfobya bakanahakana Jenoside yakorewe Abatutsi cyangwa se bakayita andi mazina.

Icyakora, Minisitiri w’Intebe Murekezi yavuze ko inzibutso ari kimwe mu bimenyetso ntakuka byemeza ko Jenoside yakorewe Abatutsi yabaye.

Yagize ati “Inzibutso ni ibimenyetso bigaragara, bivuguruza ku buryo budasubirwaho abagishaka guhakana Jenoside yakorewe Abatutsi n’abayita andi mazina.Umuntu wese usuye urwibusto, ataha abonye ukuri kuri Jenoside yakorewe Abatutsi.Ntawe ushobora kumujya mu matwi ngo amubwire ko Jenoside itabaye cyangwa ngo ayite andi mazina.”

Ahari urwibutso rwa Jenoside rwa Murambi, niho hari ingabo z’Abafaransa zari mu cyiswe Operation Turquoise.

Mutangana watanze ubuhamya, yavuze ko ntacyo izo ngabo zakoze ngo zirokore Abatutsi bari bahungiye I Murambi.

Minisitiri w’Intebe Murekezi yavuze ko uruhare rw’Ubufaransa muri Jenoside rwigaragaza, cyane cyane I Murambi.

Yagize ati “Ubuhamya bwa Mutangana bwavuguruje abagishaka gupfobya Jenoside, baba abanyarwanda cyangwa Abanyamahanga.Uruhare Ubufaransa n’ingabo zabwo bagize muri Jenoside yakorewe Abatutsi mu Rwanda rurigaragaza hano I Murambi, rurigaragaza no mu Rwanda hose.”

Urwibutso rwa Jenoside rwa Murambi rushyinguyemo imibiri y’inzirakarengane zazize Jenoside yakorewe Abatutsi isaga ibihumbi 50.


Amafoto:Kwibuka

Yisangize Inshuti.

Ibitekerezo

Tanga Igitekerezo