Minisante yibutse abayikoreraga bishwe muri Jenoside

Minisiteri y’ubuzima n’ibigo biyishakimiyeho bibutse abari abakozi bayo bishwe muri Jenoside yakorewe Abatutsi muri Mata 1994.

Kuri uyu wa Kane abakozi b’iyi Minisiteri batangiye uyu muhango bunamira abashyinguye mu rwibutso rwa Jenoside rwa Rebero mu karere ka Kicukiro.

Muri uyu muhango umwe mu bari abakozi muri iyi Minisiteri wakoraga mu ishami ryo gutanga amaraso Alexisia Mukamazimpaka mu buhamya bwe yavuze ko Abatutsi bakoraga muri iyi minisiteri amadosiye yabo yabaga yanditseho ubwoko bwabo, ibintu byatumaga abayobozi babona uko babakandamiza.

Ati "Mu madosiye y’akazi kacu muri Minisiteri y’ubuzima sinzi niba minisiteri ikiyafite habaga harimo amoko uri umuhutu cyangwa uri umututsi, haboneka inyungu mu kazi bakabanza kwibaza ubwoko bwawe ari ubuhe kugirango bakore icyo bitaga iringaniza.”

Mukamazimpaka wakoraga mu ishami ry’ubuzima avuga ko ku Batutsi kujya mu cyaro kuzana amaraso byari bigoye kuko ngo hari ubwo bababuzaga bavuga ko ari ibyitso by’Inkotanyi.

Ati "Hari n’ubwo abasirikare baduhagarikaga bakatubwira bati mwebwe muri ibyitso by’Inyenzi, muri Inkotanyi nimusubireyo, tugaharara ahongaho ariko nyuma baza gutekereza ko tugomba kujya kuzana amaraso bakaturekura.... buriya abantu bakenera amaraso cyane ni inkomere muri icyo gihe rero abakomerekaga cyane ni abasirikare babaga bari ku rugamba.”

Iradukunda Phiona, umwe mu bana bakomoka ku bari abakozi bakoraga ba MINISANTE, nyuma yo kuvuga inzira y’umusaraba umubyeyi we yaciyemo kugeza yishwe yavuze ko yishimira ko iyi Minisiteri yabafashije ikishyurira musaza we amashuri ubu bakaba bameze neza.

Ati :”Babashije kwishyurira musaza wanjye amashuri arangiza kaminuza, ubu ameze neza ariko nanjye leta yaramfashije ndayarangiza.”

Dr Diane Gashumba, Minisitiri w’Ubuzima yagaye cyane abaganga bijanditse mu bwicanyi, nyamara akazi kabo kari ako kubakiza.

Yavuze ko bakomeje kwita ku bantu bakomoka ku miryango yakoraga muri MINISANTE yishwe kandi ko bazanakomeza kubafasha.

Ati "Abo tuzi turabasura, tukabafata mu mugongo tugakomeza kubaba hafi kugirango boye kwiheba. Minisiteri y’ubuzima kimwe na guverinoma y’u Rwanda muri rusange dukomeza gufasha imiryango yasigaye cyane cyane twita ku bari bafite ababo bakoraga mu bigo by’ubuvuzi no muri Minisiteri y’ubuzima.”

Abantu 37 nibo bari abakozi Minisiteri y’ubuzima bishwe muri Jenoside yakorewe Abatutsi, ariko iyi minisiteri yibuka n’abari abakozi b’ibigo biyishamikiyeho.


Minisitiri w’ubuzima Dr Diane Gashumba yanenze abaganga bakoze jenoside



Abakozi b’iyi Minisiteri bibutse bagenzi babo bishwe muri jenoside

Yisangize Inshuti.

Ibitekerezo

Tanga Igitekerezo