Dr Ngamije yasabye abiga muri UNILAK kwirinda kumwara imbere y’ikibi

Dr Ngamije Jean, Umuyobozi wa UNILAK

Ku mugoroba wo ku wa kane itariki 27 Mata 2017; abanyeshuri bafatanyije n’abayobozi ba UNILAK-Kigali Campus hamwe n’abashyitsi batandukanye bifatanyije n’abanyarwanda kwibuka abazize Jenoside yakorewe Abatutsi muri Mata 1994.

Ni umuhango waranzwe n’urugendo rwo kwibuka rwatangiriye ku cyicaro cya UNILAK- BRALIRWA- SONATUBE- UNILAK. Nyuma y’urugendo hakaba hacanywe urumuri rw’icyizere hanatangwa ubutumwa bw’icyizere.

Aha ikaze abitabiriye uwo muhango wo kwibuka, umuyobozi wa Kaminuza ya UNILAK Dr. Ngamije Jean yibukije abanyeshuri ko ari urumuri rugomba kumurika no kwamagana ikibi icyo aricyo cyose.

“Mwibuke ko muri urumuri, kandi akamaro karwo ni ukumurika. Muri intore kandi intore ntimwara. Mwige mumenye amateka y’icyateye ikibi mumenye n’uko mwagikumira. Muharanire kubaka igihugu no gusigasira ibyagezweho.”

Abanyeshuri ba UNILAK beretswe ibimenyetso by’uburyo ingengabitekerezo ya Jenoside ikiriho ndetse bahabwa ubutumwa bwo gukomeza kuyirwanya no kuyitunga agatoki kugira ngo abo igaragayeho bahanwe haba ku ishuri ndetse no mu miryango bakomokamo.

Dr Gasanabo Jean Damascene, umuyobozi muri Komisiyo ishinzwe kurwanya Jenoside yagize ati “Intego yanyu ibe ko Jenoside itazongera kubaho ukundi mukiri kuri iyi si. Mwunge muryo Perezida wa Republika Paul Kagame yavuze ko Jenoside idashobora kongera kubaho ukundi akiri muri ubu buzima.”

Senateri Tito Rutaremara yagarutse ku mateka y’urwango rwacengejwe igihe kirekire mu bana b’u Rwanda, aho batojwe ko nta sano bafitanye, ari nabyo byabaye impamvu y’urupfu rwahitanye benshi kandi mu gihe gito.

Yahumurije abarokotse Jenoside anabasaba gukomeza gutwaza gitwari.

Ati “Muhumure, mufite igihugu kibakunda, cyiteguye kubarinda no kubarengera. Jenoside ntizongera kubaho ukundi.”

UNILAK yashinzwe mu mwaka w’1997 nyuma gato ya Jenoside yakorewe Abatutsi. N’Ubwo nta bakozi cyangwa abanyeshuri bayo bayiguyemo mu gihe cya Jenoside, biri mu muco wayo ko buri mwaka yifatanya n’abanyarwanda kwibuka Jenoside yakorewe Abatutsi.


Hakorwa Urugendo rwo Kwibuka

Sen Rutaremara acana urumuri rw’icyizere

Senateri Tito Rutaremara

Dr Gasanabo, umuyobozi muri CNLG

Yisangize Inshuti.

Ibitekerezo

Tanga Igitekerezo