Abarokotse barokotse kuko birwanyeho, ntabwo ari uko ababicaga babababariye –Minisitiri Kabarebe

Minisitiri w’ingabo mu Rwanda Gen James Kabarebe yavuze ko abanyarwanda bose bakwiye gufatira isomo rikomeye ku batutsi bo muri Bisesero bashoboye kwirwanaho mu gihe bahigwaga muri jenoside yakorewe abatutsi bakabasha guhangana n’ababahigaga kandi barafashwaga n’abafaransa bari bitwaje intwaro zikomeye.

Ibi Minisitiri Kabarebe yabivuze kuri uyu wa 10 Mata 2017, mu muhango wo kwibuka abatutsi bazize Jenoside yakorewe abatutsi ku rwibutso rwa Bisesero ruherereye mu ntara y’Iburengerazuba, Akarere ka Karongi, umurenge wa Gishyita, akagari ka Bisesero rushyinguyemo abatutsi basaga ibihumbi 50.

Abatutsi bo mu Bisesero bashimirwa amateka y’umwihariko yo kurwana n’ababagihaga bagahangana na bo igihe kirekire kandi nta ntwaro zifatika bari bafite uretse inkoni n’amabuye. Uku kwirwanaho kwarakomeje kugeza aho abari mu mugambi wo kwica abatutsi bose bo mu gihugu babifashijwemo nabafaransa bagiye umugambi wo kujya mu Bisesero umunsi umwe kugirango babashe kubanesha.

Ibi nibyo Minisitiri w’Ingabo Gen James Kabarebe yahereyeho avuga ko ayo mateka akwiye kubera isomo abanyarwanda by’umwihariko urubyiruko.

Ati: “Jenoside yabaye mu gihugu cyacu hose ariko buri hantu hagiye hagira umwihariko waho, n’aha mu Bisesero naho hafite umwihariko waho urangwa n’ibintu bibiri. Icya mbere, ni ubutwari abanya-Bisesero bagize bukomeye cyane burimo kunamba, burimo kwanga kwicwa, bagakoresha uburyo bwose bushoboka bagahangana n’umwanzi. Undi mwihariko waho ni akagambane bagiriwe n’abafaransa. Abazungu badafite icyo bapfana n’u Rwanda, badafite inkomoko mu Rwanda badafite ubusekuruza mu Rwanda, batakabaye bafite icyabazanye mu Rwanda badafite n’uburenganzira bwo kuhaba no kuhakorera icyo ari cyo cyose, ariko byarabaye.”

Yavuze ko Abafaransa bagiye bafatanya n’abakoze jenoside mu buryo butandukanye. Ati: “Aba bantu rero bafanyije n’abicanyi hano ari abanyamahanga b’abafaransa, batangiye kera cyane, ari ingengabitekerezo ya jenoside bayigizemo uruhare, ari ukuyishyira mu bikorwa babigizemo uruhare. Intambara yo kubohora igihugu mu 1990 itangira baraje barwanya FPR inkotanyi, barwana n’ingabo z’inkotanyi kuva mu 1990 kugeza 1993.”

Gusa ngo ibi bitero byabo byose bagendaga bagaba baratsindwaga kuko nubundi barwaniraga ikinyoma mu gihe inkotanyi zo zarwaniraga kurengera abanyarwanda.

“Bararwanye baratsindwa, baranahunga, barananirwa. Izo ni imbaraga zikomeye cyane kandi zishingiye ku kurwanira ukuri, ntacyo barwaniraga, ntacyo barengeraga, Inkotanyi zarengeraga abanyarwanda, zarengeraga igihugu cyabo zaranitangaga. Umufaransa ibyo yitangiraga ni ibiki? Iyo urwanira ku ruhande rubi nubwo waba ufite imbaraga zingana zite uratsindwa!”

Yakomeje avuga ko nyuma yo gutsindwa inshuro nyinshi mu myakaya mbere ya 1994, bagarutse no mu 1994 baje gushyira mu bikorwa umugambi wa jenoside yakorewe abatutsi. Ati: “Abafaransa baza muri zone turukwaze bari baje kurwanira uruhande rwa Leta y’abicanyi, baje ari 2400, bari bafite intwaro zikomeye cyane, bari bafite za burende, bafite indege hakurya hariya muri Kongo, bari bakomeye cyane, ..”

Yavuze ko nyuma yo gutsindwa n’ingabo zari iza RPF kubera ubumwe n’urukundo rwaziteraga kwitangira igihugu cyazo, ngo abo banyamahanga bafashe umwanzuro wo kwimurira Leta yateguye jenoside bagijyana muri Kongo.

Ati:“Bamaze gutsindwa icyo bakoze cyari ugufata iriya Leta yose, n’abasirikare, n’ibikoresho byabo n’interahamwe barabyimura barabyambutsa babijyana hakurya hariya (muri Congo).”

Minisitiri Kabarebe yavuze ko abafaransa bakomeje gufasha abicanyi babaha intwaro ngo bazagaruke mu Rwanda kwica abatutsi basigaye ndetse ngo kugeza n’ubu baracyabafasha.

Ati: “Nubu twumva ko hari abakiri muri ayo mashyamba ariko badafite icyo bashoboye kugeraho,... abo baracyari kumwe n’ababajyanyeyo, baracyabagira iyo nama, baracyavugana nabo, baracyabizeza ibitangaza.”

Gusa yavuze ko nubwo bakomeje gukwirakwiza ingengabitekerezo ya Jenoside ntacyo bazageraho kuko imbaraga zarwaniye igihugu zikagikura muri Jenoside ntaho zagiye ahubwo zariyongereye bityo ngo ntabwo umugambi wabo bazawugeraho ahubwo ngo bakwiye kwiga isomo ryuko bitashoboka ko abantu barimbura abandi burundu nubwo ari wo mugambi abahigaga abatutsi bari bafite.

Ati: “Abarokotse barokotse kubera ko birwanyeho ntabwo ari uko ababicaga babababariye, isomo rero rigaragara ari naryo rikwiye kugaragarira abari bafite umugambi wo gukora jenoside no kurimbura burundu abantu, ni uko bitashoboka, ntabwo byashoboka ko barimbura abantu burundu, ntabwo byakunda! Baba bake, baba bafite imbaraga nke ntabwo bikunda Kandi byaragaragaye!”

Abatanze ubuhamya bose bagarutse ku buryo abanyabisesero bagiye birwanaho mu buryo butandukanye kubera ubumwe bari bafite n’indangagaciro z’ubunyarwanda.

Amafoto:Kwibuka

Yisangize Inshuti.

Ibitekerezo

Tanga Igitekerezo