Abanyarwanda baba muri Liberia bifatanyije n’abanya-liberia mu kwibuka Jenoside yakorewe Abatutsi

Ku wa gatandatu taliki ya 29 Mata, Abanyarwanda baba mu gihugu cya Liberia bakoze umuhango wo kwibuka jenoside yakorewe Abatutsi mu 1994.

Uwo muhango wabaye ku bufatanye bw’umuryango w’Abanyarwanda baba muri icyo gihugu na University of Liberia ndetse n’ishyirahamwe ry’Abanyaliberia barokotse icyorezo cya Ebola, ukaba kandi warahuruje abanyeshuri n’abarimu bo muri iyo univerisite, abahagarariye imiryango mpuzamahanga (ONU, African Union) ndetse na Ministre wungirije w’Ububanyi n’amahanga wari uhagarariye guverinoma ya Liberia.

Uwo muhango wabimburiwe n’urugendo rwo kwibuka inzirakarengane zisaga miliyona bishwe mu gihe cy’iminsi ijana gusa, ruza gukomereza ku biganiro byatanzwe n’abayobozi banyuranye bari bawitabiriye nyuma yo kureba filime yerekana uruhare rw’abanyapolitiki mu gutegura no gushyira mu bikorwa jenoside, hamwe n’uruhare rw’urubyiruko mu rugendo wr’iterambere n’ubwiyunge u Rwanda rumaze kubamo icyitegererezo.

Mu izina ry’Abanyarwanda, bwana Wycliffe Kwikiriza yashimiye abitabiriye uwo muhango ndetse anabasobanurira ku buryo burambuye ingaruka za jenoside ku banyarwanda n’uburyo bose bishyize hamwe bakishakamo ibisubizo babifashijwemo n’imiyoborere myiza yimirijwe imbere n’abayobozi b’u Rwanda. Yashishikarije cyane urubyiruko kwigira ku byo babonye haba muri filime ndetse no mu biganiro biyikurikiye, bakazaba abayobozi beza b’ejo hazaza. Yanihanganishije abarokotse ku icumu rya Ebola bari bagaragaje inyota yo kumenya uburyo Abanyarwanda bikuye mu bibazo nyuma yo kubura ababo nk’uko byagendekeye Abanya Liberia haba mu ntambara icyo gihugu cyanyuzemo ndetse n’icyorezo cya Ebola cyahitanye abatari bake.

Elias Shonoyin Ministri wungirije w’ububanyi n’amahanga muri Liberia .

Abari bahagarariye imiryango mpuzamahanga (ONU na African Union) na bo bashimye intambwe u Rwanda rumaze gutera haba mu miyoborere, mu iterambere ry’abaturage ndetse no kugira uruhare mu kubungabunga amahoro hirya no hino muri Afurika.

By’umwihariko, Minisitiri w’ububanyi n’amahanga wungirije wa Liberia yongeye kwibutsa uko jenoside yabaye amahanga arebera ntagire icyo akora, ariko ibyo bikaba byarigishije Abanyarwanda ko ari bo ubwabo bakwiye kubonera umuti ibibazo byabo. Yashimye Abanyarwanda ati “Afurika ifite byinshi igomba kubigiraho”.

Yisangize Inshuti.

Ibitekerezo

Tanga Igitekerezo