Abakozi ba CMA, RSE na iCPAR baremeye abacitse ku icumu i Nyamagabe

Abarokotse bahawe matela zo kuryamaho

Abakozi b’Ikigo Kigenzura Isoko ry’Imari n’Imigabane mu Rwanda (CMA), Isoko ry’Imari n’Imigabane (RSE) ndetse n’urugaga ruhuza abaruramari b’umwuga mu Rwanda (Icpar) baremeye abarokotse Jenoside yakorewe Abatutsi 26 batuye mu Murenge wa Gasaka mu Karere ka Nyamagabe.

Mubyo baremeye abacitse ku icumu harimo matela 26 n’ubwisungane mu kwivuza ku miryango 26 n’abayigize bose no kwishyura abana babiri amashuri, byose bikaba bifite agaciro k’amafaranga y’u Rwanda akabakaba miliyoni 2.

Kuri bamwe mu bafashijwe bavuze ko ari igikorwa gikomeye kibafasha kwiyubaka no guhindura imibereho. Nsengiyumva Innocent atuye mu Kagari ka Nyamugari mu murenge wa Gasaka i Nyamagabe, yavuze ko mbere baryamaga ku musambi bitewe n’ubushobozi buke.

Yagize ati: “Mbere y’uko duhabwa matela rero nta yindi twari dufite kwirarira ni kubi. Twaryamaga dukoresheje umusambi tukiyorosa ikiringiti.”

Umufariso ngo ugiye kubafasha kuryama heza nta kubyuka bakanda imbavu cyangwa bafite amavunane.

Ku kirebana n’ubwisungane mu kwivuza bahawe,yavuze ko ubwo bari bafite bwari bugiye kurangira kandi ko n’ajya guhamisha mitiweli nshya bizabafasha kwivuza umwaka wose bitabagoye.

Ni mu gihe ngo nta bushobozi bari bafite bari baranatangiye kwibaza aho bazakura ubwisungane mu kwivuza,we n’umugore n’abana batatu, Mukamana Beata nawe agira ati: “Tugiye kuryama heza, ikindi cyiyongeraho baturihiye ubwisungane mu kwivuza, ni ikintu cyatugoraga cyane kukibona. Murakoze mujye muhora mutekereza ku bantu nk’aba.”

Umuyobozi Mukuru wungirije w’Ikigo Kigenzura Isoko ry’Imari n’Imigabane mu Rwanda (CMA), Bundugu Eric avuga ko kuremera abarokotse Jenoside yakorewe Abatutsi babikora buri mwaka bagamije kubafasha kwiyubaka.

Yagize ati “Ntabwo tuzategereza ngo Leta ikore ibintu byose kuko natwe dufite inshingano zo gufasha Leta gushimangira icyizere twagaruwemo nk’Abanyarwanda niyo mpamvu twatekereje kubafasha uko dushoboye.”

Umuyobozi w’imirimo rusange mu Karere ka Nyamagabe, Ngabonziza Jean Bosco yemeza ko gufasha abarokotse Jenoside yakorewe Abatutsi bibasubizamo icyizere bikabereka ko bagifite ababitayeho, yagize ati: “Iyo umuntu aryamye heza atekereza neza.Iyo umuntu aguhaye mitiweli aba aguhaye ubuzima.”

Uretse inkunga yatanzwe,umwe mu bakozi b’ibi bigo ushinzwe ubuhuza akaba yanahise yemera kuzarihirira abana babiri batishoboye akarere kazamushakira, amashuri abanza n’ayisumbuye.

Abakozi ba CMA, RSE, iCPAR nyuma yo gusobanurirwa amateka y’Urwibutso rwa Jenoside yakorewe abatutsi rwa Murambi rushyinguyemo imibiri isaga ibihumbi 50 bunamiye inzirakarengane ziharuhukiye.

Yisangize Inshuti.

Ibitekerezo

Tanga Igitekerezo