Umuhungu wa Sipiriyani Rugamba asobanura byinshi ku kaga se yahuye na ko ubwo yahabwaga akazi muri Leta

1

Rugamba Olivier avuga ko se yahoraga akurwa mu kazi azizwa ibitekerezo bye

Rugamba Olivier, umuhungu wa Rugamba Sipiriyani wishwe mu gihe cya Jenoside yakorewe Abatutsi mu 1994, avuga ko se yagize ibihe byiza kuri Leta yakoranye nazo ariko akanagira ibihe bibi byanaruse ibyiza yagize igihe kinini, byanamugejeje ku rupfu we n’umuryango we hafi ya wose.

Rugamba Olivier avuga ko se yize kandi ko yari umunyabwenge cyane byanatumye hari imyaka yagiye asimbukishwa akiga igihe gito kuko yari umuhanga mu ishuri.

Rugamba Oliver ariko ashimangira ko umubyeyi we yagize ibihe byiza ariko akanagira ibihe bibi byabaye igihe gito ariko bikarusha ubukana ibyiza yagize igihe kinini.

Ati:”Rugamba ni umuntu wagize ibihe byiza kuri Leta yakozeho, agira n’ibihe bibi cyane nkeka ko umuntu ashyize ku munzani, ibihe yagize bibi bifite imyaka mike ariko bifite uburemere busumba ya myaka yindi yagizemo ibihe byiza."

Yakomeje agira ati: "Ni umugabo wize amashuri, yarize aratsinda yewe hamwe na hamwe mu mashuri amwe za pirimeri bagendaga bamusimbukisha imyaka kuko yari umuhanga. Tumeneyereye ko pirimeri (primaire) umuntu yiga imyaka 6 ariko we yayize mu myaka 5 kubera ko aho yize mu bapadiri babonaga atsinda neza.”

Rugamba Olivier avuga ko se umubyara yahise akomereza mu iseminari ndetse akaza no kujya mu isemirani nkuru I Kabgayi kwigira ubupadiri ariko akaza kubireka asigaje imyaka ibiri ngo abe umupadiri. Uyu muhungu we avuga ko se yaretse kuba padiri bitewe n’uko ngo yabonaga indangagaciro yasanze mu gipadiri zihabanye n’izo yatekerezaga ko zibayo mbere y’uko ajya kubyiga.

Rugamba ngo yahise akomereza muri kaminuza I Burundi nyuma ndetse aza no kwerekeza mu Bubiligi gukomerezayo amashuri ye.

Avuga ko se yaje gukorera Leta yo ku bwa Perezida Kayibanda ariko akaza kumwirukana kuko yihaye ibyo kurengera abatutsi ku Kibuye aho yari yamujyanye kuyobora.

Ati:” Nyuma yaje gukora ku bwa Kayibanda ariko nyuma aza kumwirukana yamugize perefe ku Kibuye aramubwira ati ndagusaba kujya ku Kibuye hari abatutsi bigometse genda ubankize undi ahageze arabwira ati ntimugire ikibazo ntawuzabakoraho mpari Kayibanda ati si ibyo nagutumye amukuraho.”

Rugamaba ngo yahise asubira kwiga ariko n’aho agarukiye ibikorwa bye ngo ntibyatumaga aramba mu kazi kugeza igihe yiciwe muri Mata 1994 ndetse na bamwe mu bagize umuryango we.

Ati:”Asubira kwiga, aragaruka ajya muri Minisiteri y’uburezi, nyuma naho aza kuhava kugeza ubwo agiye muri IERST baza kuhamukura naho kubera ko yari amaze igihe ibintu uko abibona ariko abivuga adahishira, baravuga bati uyu nguyu ntabwo twashobokana kugeza ubwo ku itariki ya 7 z’ukwa kane muri 94 saa tatu za mu gitondo baje baramwica n’umuryango we. Sinavuga ngo ni wose kuko jyewe mpari ariko yari yarabyaye abana 10 bica 6 ubu turi bane."

Rugamba Olivier ashimira se ko yanze guceceka akavuga ibintu bibi yabonaga bibera mu gihugu abicishije mu busizi ndetse akanavuga ko hari n’abandi bahanzi babicishije mu busizi bagatanga ubutumwa bwubaka.

Rugamba Olivier asaba abahanzi b’iki gihe guhanga ibintu bitanga ubutumwa bwubaka umuryango nyarwanda.

Yisangize Inshuti.

Ibitekerezo 1

Tanga Igitekerezo