Nyuma ya Kiliziya Gatolika, Abangilikani nabo bashinjwe guhakana Jenoside yakorewe abatutsi

5

Tom Ndahiro avuga ko itangazo ryo kubika Ngirinshuti rihakana Jenoside

Nyuma y’aho Kiriziya Gatolika ishinjijwe gutoneka abarokotse Jenoside yakorewe abatutsi mu 1994 itumira abakirisitu mu munsi mukuru wo kwizihiza yubile y’imyaka 25 y’abapadiri barimo n’abahamijwe ibyaha bya Jenoside, kuri ubu itorero ry’Abangilikani na ryo rirashinjwa guhakana Jenoside mu itangazo ryo kubika umupasiteri wari wakatiwe burundu kubera ibyaha bya Jenoside yakorewe abatutsi yahamijwe.

Mu mpera z’icyumweru gishize nibwo hasakaye ubutumire bwa Diyosezi ya Kabgayi butumira abakirisitu kwitabira umuhango wo gutanga isakaramentu ry’ubusaseredoti ndetse ndetse no kwizihiza Yubile y’imyaka 25 y’abapadiri barimo n’abahamijwe ibyaha bya Jenoside.

Ubwo butumire ntibwakiriwe neza na bamwe mu barokotse Jenoside yakorewe abatutsi, aho bavuze ko ari ukubatoneka kuko umuntu wakoze ibyaha ndengakamere nka Jenoside adakwiriwe gukorerwa ibirori nk’umuntu wakoreye Imana nyamara yarakoze amabi.

Kuri uyu wa 27 Kamena 2016, Tom Ndahiro umushakashatsi kuri Jenoside yagaragaje itangazo ryo kubika pasiteri Ngirishuti Anastase witabye Imana tariki 04 Mutarama 2016, avuga ko ryuzuyemo uguhakana Jenoside.

Yagize ati “Itorero ry’Abangilikani mu guhakana. Ngirinshuti yasingijwe nk’umuntu w’Imana, yari umujenosideri wakatiwe burundu.”

Tom Ndahiro aganira na Makuruki.rw yavuze ko impamvu iri tangazo ryo kubika ryatanzwe na diyosezi ya Kigeme ririmo guhakana Jenoside ari uko abaritanze batigeze bagaragaza ko uwo bita umukozi w’Imana yaguye muri gereza ndetse akaba yari afungiye ibyaha bya Jenoside yakorewe abatutsi.

Yagize ati “Guhakana Jenoside ni uko guhisha icyo uwo muntu yakoze, kuba yarakatiwe burundu kandi yari afite icyaha cyo kwica abantu abaziza uko baremwe.”


Tom Ndahiro asanga iri tangazo ririmo guhakana Jenoside yakorewe abatutsi

Tom Ndahiro kandi yavuze ko ikindi kandi gikomeye ari uko no mu muhango wo kumushyingura ngo bavuze ko bamusubije agaciro yari yarambuwe mu gihe yari afunze.

Yagize ati “Bamuhambye nk’umuntu w’intwari yabo, banavuga ko ashubijwe agaciro yari yarambuwe kuba yari afunze.”

Musenyeri wa Diyoseze ya Kigeme Mvunabandi Augustin yabwiye Makuruki.rw ko kuba bataragaragaje mu itangazo ryo kubika ko pasiteri Ngirishuti Anastase yakoze Jenoside, batari gushyira ibintu byose mu itangazo. Yavuze kandi ko kuba bataragaragaje aho yaguye babyibagiwe ariko ngo nta mugambi wo gupfobya Jenoside bari bafite.

Yagize ati “Itangazo ntiribamo byose, ariko mu gihe twamuherekezaga byose twarabivuze twavuze ko yari afunze yaguye muri gereza. Aho yaguye ibyo byaratwibagiye ntago ibintu byose umuntu yahita abyibuka ariko nta mugambi wo gupfobya Jenoside wari urimo.”

Kuba mu kumushyingura baravuze ko bamushubije agaciro yari yarambuwe, Musenyeri Mvunabandi Augustin yavuze ko nta byavuzwe ndetse ko nta n’uwabivuga.

Yagize ati “ Ibyo nta wabivuze kuko urumva ngo asubijwe agaciro… mu nyigisho zatanzwe ndumva zirahari niba hari uwakurikiranye ntawigeze avuga ngo asubijwe agaciro nta n’uwabivuga.”

Musenyeri Mvunabandi Augustin avuga ko iyo umupaseteri yafungiwe Jenoside akarangiza igihano cye agaruka mu rusengero nk’abandi byagaragara ko yihannye bya nyabyo akongera guhabwa inshingano zo kuba pasiteri.

Kugeza ubu umupasiteri umwe wahamijwe ibyaha bya Jenoside akaba ari we wasubiye ku mirimo ye nyuma yo kurangiza igihano cye.

Pasiteri Ngirinshuti Anastase yari yarakatiwe igifungo cya burundu ibyaha yahamijwe akaba yari yarabikoreye I Shyogwe mu Karere ka Muhanga.

Yisangize Inshuti.

Ibitekerezo 5

  1. Tom nabandi mutekyereza nkawe mugomba gutandukanya egifungo kyo uwakoze ibyaha, nugufashya umunyabyaha kubivamu. Niba twipfuza Rwanda nshya tugomba nugushya ubulyo bwoguhindura imitecyereze ya bantu mu Rwanda.

  2. Tom nabandi mutekyereza nkawe mugomba gutandukanya egifungo kyo uwakoze ibyaha, nugufashya umunyabyaha kubivamu. Niba twipfuza Rwanda nshya tugomba nugushya ubulyo bwoguhindura imitecyereze ya bantu mu Rwanda.

  3. Ndabona uyumugabo yifuza ko u Rwanda rugendera kumategeko ya Sharia akoreshwa muri za leta ya kiyisilamu. Ntitukagwe mukiyaga tukita uruziba.

  4. Isyi ubu ndi se gutanga itangazo bitwaye iki.Ariko ye.Tom we uzaba umuhezanguni kugeza ryari.Baramaze ntakibi bakoze.Mujye muvana ubugome aho

Tanga Igitekerezo