Nyamagabe: Ahazwi nko mu Bunyambiriri bibutse abazize Jenoside yakorewe Abatutsi bizezwa kuzurizwa urwibutso

Meya Mugisha Philbert yasezeranyije abatuye umurenge wa Musange kurangiza vuba imirimo yo kubaka urwibutso rwa Musange

Kuri uyu wa 05 Kamena 2016, mu karere ka Nyamagabe mu mirenge ya Kaduha na Musange ahazwi nko mu Bunyambiriri, bibutse ababo bazize Jenoside yakorewe Abatutsi ku nshuro ya 22 bizezwa ko urwibutso rwa Musange ruzaba rwuzuye bitarenze muri Mata umwaka utaha.

Igikorwa cyo kwibuka abazize Jenoside mu mirenge ya Kaduha na Musange, cyabanjirijwe n’ijoro ryo kwibuka, aho hatanzwe ubuhamya butandukanye bw’abarokokeye aho mu Bunyambiriri.

Mu buhamya bwatanzwe n’umwe mu barokokeye I Musange, Giramata Marie Claire, yavuze inzira yaciyemo we n’akana bari bari kumwe icyo gihe. Ubuhamya bwe bwashenguye imitima ya benshi mu bari muri uwo muhango.

Uyu mubyeyi yavuze ko hari aho bageze bakabata mu cyobo ari bazima nyuma bakaza gukurwamo n’abagiraneza. Uyu warokokeye aha I Musange yashimiye umuryango wamuhishe akesha ubuzima uyu munsi

Karemera Ildephose wavuze mu izina ry’imiryango ishyinguye ababo aha I Musange, yasabye abaturage bazi ahari imibiri y’abazize Jenoside gutanga amakuru kugira ngo bashyingurwe mu cyubahiro.

Karemera yagize ati: “ Turi muri Leta y’ubumwe bw’abanyarwanda, ntawavuga ngo yabonye ahari umubiri w’umuntu wishwe muri Jenoside ngo abizire ariko kuba mutatwereka ahari abacu kandi muhazi, ni ikintu tubagaya.”

Umuyobozi w’Akarere ka Nyamagabe Mugisha Philbert wari umushyitsi mukuru muri uwo muhango, yasabye abitabiriye uwo muhango gufatanya n’inzego zose kurwanya ingengabitekerezo ya Jonoside no kugaragaza ahantu hari imibiri y’abazize Jenoside batarashyingurwa mu cyubahiro.

Uyu muyobozi yakomeje avuga ko muri iki gihe cyo kwibuka mu karere ka Nyamagabe hagaragaye ingengabitekerezo ya Jenoside inshuro zigera ku 5 mu mirenge 17 igize ako karere.

Meya Mugisha yanenze abagaragayeho ingengabitekerezo aho yatanze urugero rwo mu murenge wa Mbazi aho mu gihe cy’icyunamo hagaragaye ingengabitekerezo irimo n’ubugome bukomeye

Yagize ati: “Muri iki cyumweru dushoje abantu bataramenyekana bitwikiriye ijoro bajya kumva iruhukiyemo imibiri y’abacu bishwe muri Jenoside bagerageza kuyicukura n’ubwo igikorwa bari batangiye batakigezeho kuko imibiri batabashije kuyitwara ariko igikorwa cyo cyarakozwe bagamije gushengura abacutse kw’icumu rya Jenoside

Uyu muyobozi yavuze ko hari impamvu zitandukanye zatumye urwibutso rwa Musange rutinda kuzura ariko abasezeranya kuba rwaruzuye bitarenze umwaka utaha.

Yagize ati: “Hari impamvu zitandukanye zatumye urwibutso rwa Musange rutinda kuzura harimo iz’imicungire mibi y’abari bashinzwe kurukurikirana ngo rwuzure vuba, ubundi uru rwibutso rwakagombye kuba rwaruzuye ariko umwaka utaha abazaza kwibukira hano bazibukira ku rwibutso rwuzuye.”

Mu murenge wa Musange hashyinguye imibiri y’abatutsi ibihumbi birenga 26317 naho ku rwibutso rwa Kaduha ho hashyinguwemo imibiri irenga ibihumbi 46920 y’abatutsi bishwe muri Jenoside yakorewe Abatutsi muri Mata 1994.


Giramata Marie Claire yatanze ubuhamya bwashenguye abari aho


Abayobozi bunamiye ndetse banashyira indabo ku mva


Abayobozi mu nagbo na polisi nabo bari bifatanyije n’abaturage mu kwibuka


Abaturage nabo bari bitabiriye umuhango wo kwibuka Jenoside yakorewe abatutsi baguye mu Bunyambiriri

Jean Paul Nkundineza

MAKURUKI.RW

Yisangize Inshuti.

Ibitekerezo

Tanga Igitekerezo