Minisitiri Uwacu yatanze umukoro ubwo hibukwaga abari abakozi ba MIJEUMA bishwe muri Jenoside

Minisiteri y’umuco na siporo yibutse abari abakozi b’icyari Minisiteri y’urubyiruko n’amashyirahamwe MIJEUMA, muri uyu muhango Minisitiri Uwacu yasabye ko mu gikorwa nk’iki abantu bajya bazirikana ibyo bakora niba hari ubutumwa bisigira abanyarwanda baba abaririmbyi cyangwa abakinnyi.

Uyu muhango wabimburiwe n’urugendo rwahereye ku Kimihurura ahazwi nka KBC rugera kuri sitade Amahoro ahahise hakomereza iyi mihango.

Abatanze ibiganiro n’ubuhamya abenshi bagarutse ku bugome jenoside yakorewe Abatutsi yakoranywe ndetse ariko banasaba ko intambwe ikomeje guterwa mu kubaka igihugu yakomeza.

Rugambwa Olivier umuhungu wa Rugamba Cyprien ni umwe mu batanze ubuhamya yibanda kubutwari bwa se kuko kenshi yaranzwe no kurengera Abatutsi bahohoterwaga ariko anagenera ubuhamya abahanzi b’ubu abasaba guhanga no kuririmba ibintu bitanga ubutumwa ku babyumva .

Ati:” impamvu dukunda indirimbo za cyera si injyana yazo gusa ahubwo ni n’ubutumwa zatangaga, niyo mpamvu rero nsaba n’abahanzi b’ubu kureba ibyo baririrmba ubutumwa biha abanyarwanda mbere y’uko igihangano kigutwara amafaranga ubanze urebe mu myaka 10 iri imbere niba abantu bazaba bakigiha agaciro.”


Rugamba Olivier umuhungu wa Rugamba Cyprien

Rugamba yavuze ko n’ubwo jenoside yakoranywe ubugome ariko hari abantu batinyutse kubirwanya birengagije ingaruka bizabaviramo abenshi babikora babicishije mu bihangano.

Kayiranga Albert ushinzwe siporo mu cyahoze ari kaminuza y’u Rwanda ndetse no mu mikino y’amashuri mu buhamya bwe yavuze ko mbere ya jenoside bakinaga kandi bagakundana nk’abakinnyi n’ubwo hataburagamo abagaragazaga amwe mu magambo cyangwa amarenga ahembera ingengabitekerezo ya jenoside ndetse baje no kubigaragaza mu gihe cya jenoside kuko hari abakinnyi bishe bagenzi babo bakinanaga.

Kayiranga yavuze ko bidakwiye kuba sportif ko bagira ingengabitekerezo asaba aba sportif b’ubu kwigira kubyabaye bakubaka u Rwanda na siporo bitagira abacakurbiri.

Ministiri wa sipiro n’umuco Uwacu Jilienne mu butumwa yatanze yasabye ko mu gihe nk’iki aba sportif n’abafite umuco n’imyidagaduro mu nshingano bajyana umukoro wo kujya baharanira gukora ibitanga ubutumwa bwiza kubanyarwanda.

Ati:”Mu gihe rero twibuka ndagirango mbasabe tuge dusigarana n’umukoro mubyo dukora nk’uko Rugamba yabivuze haba abahanzi cyangwa se abakinnyi turebe niba ibyo dukora hari ubutumwa biha abanyarwanda turebe icyo abanyarwanda babikuramo duharanira gutanga ubutumwa bunoze mubyo dukora.”


Uwacu Julienne Minisitiri w’ umuco na siporo muri uyu muhango.

Uretse iyi mihango yabereye kuri sitade abakozi ba minisiteri y’umuco na siporo banasuye urwibutso rushyinguyemo abishwe muri jenoside ndetse banaremera abacitse ku icumu batishoboye baturiye urwo rwibutso.

Yisangize Inshuti.

Ibitekerezo

Tanga Igitekerezo