Icyaha cya mbere amadini yakoze muri Jenoside yakorewe abatutsi ni "Uguceceka" -Pasiteri Antoine Rutayisire

1

Pasiteri Antoine Rutayisire asanga amadini yarakoze ikosa rikomeye ryo guceceka mu gihe cya Jenoside.

Antoine Rutayisire umushumba mu Itorero Angilikani asanga kuba amadini yaracecetse mu gihe Jenoside yakorwaga ari kimwe mu byatije umurindi abayikoze kuko ngo amadini afite imbaraga zidasanzwe ariko zitigeze zikoreshwa mu kwamagana Jenoside yakorewe abatutsi.

Ibi Pasitoro Antoine Rutayisire yabigarutseho mu kiganiro yatanze kuri uyu wa 10 Kamena 2016 ubwo abagize Inteko Ishinga Amategeko bibukaga ku nshuro ya 22 abazize Jenoside yakorewe Abatutsi mu Rwanda muri Mata 1994 .

Muri iki kiganiro cyibandaga ku ruhare rw’amadini n’amatorero mu kurwanya ingengabitekerezo ya Jenoside, Rev Dr. Antoine Rutayisire yavuze ko kugira ngo Jenoside ikorwe ari uko inzego zose zari zatsinzwe harimo n’amadini n’amatorero kuko na bo baracecetse ntibakoresha imbaraga zabo nk’abihaye Imana mu kurwanya ingengabitekerezo ya Jenoside.

Rev Dr. Rutayisire yagize ati: "amadini nitwe twagombaga kubwira abantu ngo ibi bintu ntibikwiriye gukorwa, burya icyaha cya mbere gikomeye amadini yagize ni uguceceka, buriya ngo igisenya Isi si ubugome bw’abagome gusa, ni no guceceka kw’abantu beza, kuko amadini yose yaracecetse, nta Mufuti numvise ku Isi yose, nta n’uwo mu Rwanda na Papa nta jwi yazamuye nubwo bajya bavuga ngo ni we wamaganye Jenoside bwa mbere, burya icyaha cya mbere cy’amadini ni (Silence) Guceceka ukarebera"

Yakomeje agaragaza imbaraga amadini afite ku bantu avuga ukuntu ku munsi wo gusenga abantu bizana ntawe yahamagaye cyangwa ngo ashyireho imbaraga za Polisi, nyamara izo mbaraga zituma abantu bizana bakazana n’amaturo ngo ntizigeze zikoreshwa mu kwamagana jenosideyakorewe abatutsi.

Pasiteri Rutayisire yagize ati: :"Reka turebe imbaraga z’amadini, burya amadini agira imbaraga zo kuba ahantu hose, twebwe abantu baratwizanira, mwe iyo mutumije inama mugomba gushyiraho DASSO cyangwa Polisi, ariko njyewe nicara mu rusengero ku cyumweru abantu bakaza ntawe natumiye, nta n’ibihano ngira nta na gereza, ariko bakazana n’amaturo n’ibyacumi. Izo ni imbaraga ariko hari aho byapfiriye kuko tutazikoresheje"

Yakomeje agira ati:"Dufite ibitabo bitagatifu, aba-Islam bafite Korowani abakirisitu dufite Bibiliya, n’andi madini agira ibyabo, biriya bitabo byombi bifite ibisubizo ku ngengabitekerezo ya Jenoside ariko nabaza Mufuti nanjye nkibaza nkabaza na Bishop kuki iriya ngengabiterezo yabayeho kandi dufite ibyo bitabo? ikibazo ni uko tutigeze tubikoresha mu kuyirandura"

Asoza ikiganiro cye, Pasiteri Antoine Rutayisire yavuze ko nubwo amadini yabaye ibigwari mu gukumira Jenoside yakorewe abatutsi, kuri ubu ngo abagize amadini n’amatorero bahagurukiye kurwanya ingengabiterezo ya Jenoside kandi ngo biteguye gutanga umusanzu wabo kugirango igihugu gihinduke.

Imbaraga z’amadini n’amatorero ni kimwe mu byo Leta ihanze amaso mu gukumira ingengabitekerezo ya Jenoside no komora ibikomere Jenoside yakorewe abatutsi yasize mu banyarwanda bayirokotse, akaba ari yo mpamvu mu bihe byo kwibuka amadini n’amatorero bongera kwibutswa uruhare rwabo mu gukumira ingengabitekerezo ya Jenoside bafatanyije na Leta y’u Rwanda.


Muri uwo muhango abahagarariye Inteko Ishinga amategeko bacanye urumuri rw’ikizere

Yisangize Inshuti.

Ibitekerezo 1

Tanga Igitekerezo