Bwa mbere, G.S. Kabusunzu yibutse abarezi n’abanyeshuri bayo bazize Jenoside yakorewe abatutsi

Abanyeshuri, abarezi n’abayobozi ba G.S. Kabusunzu bifatanyje mu gikorwa cyo Kwibuka.

Abanyeshuri n’abarezi bo mu rwunge rw’ amashuri rwa Kabusunzu kuri uyu wa 18 Kamena 2016 bahuriye mu gikorwa cyo kwibuka ku nshuro ya mbere abarezi n’ abanyeshuri bagera kuri 49 bishwe muri Jenoside yakorewe abatutsi muri Mata 1994.

Iki gikorwa cyabimburiwe n’ urugendo rwo kwibuka rwatangiriye kuri iri shuri rusorezwa ku rwibutso rwa Jenoside yakorewe abatutsi ruherereye mu kagari ka Kora, Umurenge wa Gitega.

Uru rwibutso rushyinguyemo abatutsi basanga 70 biciwe mu mirenge ya Nyakabanda, Gitega na Kimisagara.

Umuyobozi w’ iri shuri, Umuhire Jean Benoit Reverien, yavuze ko iki kigorwa cyakozwe mu rwego rwo kurandura ingengabitekerezo ya Jenoside.

Yagize ati: “Kwibuka ni ukugira ngo hano twubake umuco wo kurandura ingengabitekerezo ya Jenoside. Burya kwibuka ni umuti ukaba n’ urukingo. Kugira ngo Jenoside ibe yarakozwe ishoboke ni uko abantu bari bafite ingengabitekerezo yari yarashinze imizi”

Yakomeje agira ati: “Kwibuka ni byo bizatuma duhashya ingengabitekerezo ya Jenoside, kuburyo mu myaka iri imbere twizera ko u Rwanda rwacu ruzabaho mu ituze nta bantu bafite ingengabitekerezo kuko dutangiye tubyigisha urubyiruko”

Umuhire yavuze ko kuba iri shuri ritangiye kwibuka nyuma y’ imyaka 22 nta mbogamizi yindi yabayemo, avuga ko kugira ngo iki kigorwa kigerweho umuryango AERG wabigizemo uruhare

Yagize ati: “Umwaka ushize ni bwo twashinze umuryango AERG hano mu kigo, no mu nshingano zawo, harimo gutegura iki kigokorwa ni yo mpamvu uyu munsi twabigezeho”

Ibibazo byabajijwe n’ abanyeshuri mu biganiro byari bimaze icyumweru bitangirwa muri iri shuri byeretse abarezi ko hari ubumenyi aba banyeshuri bafite kuri Jenoside yakorewe abatutsi nubwo abarezi bavuga ko budahagije

Munganyimana Christine umwarimukazi muri Groupe Scholaire Kabusunzu yagaragaje ko hari ababyeyi bataye umurongo wo gutoza abana ubumwe n’ urukundo avuga ko mwarimu agomba guhagarara muri icyo cyuho kugira ngo umunyeshuri abone uburezi n’ uburere byuzuye.

Yagize ati: “Bigaragara ko hari imiryango idatoza abana indangagaciro na kirazira, nka mwarimu na bagenzi bange iyo turi ku ishuri duhagarara muri icyo cyuho. Nyuma y’ imiryango, nyuma y’ inshuti, igihugu gifite umwana mu maboko niyo mpamvu mwarimu ahagarariye bababyeyi badashoboye kurera umwana”

Kwibuka abarezi n’ abanyeshuri ba G.S. Kabusunzu bazize Jenoside yakorewe abatutsi ni igikorwa kizakomeza kikaba ngaruka mwaka.

Iri shuri ryatakaje abanyeshuri 43 n’ abarezi 9 muri Jenoside yakorewe abatutsi mu Rwanda muri Mata 1994.

Ibi bikorwa bibaye mugihe Abanyarwanda n’ inshuti zabo kuri ubu bari mu bihe byo kwibuka iyi Jenoside ku nshuro ya 22 ku nsanganyamatsiko yo kurandura ingengabiterezo ya Jenoside.


Abana bakiri bato na bo basobanurirwa amateka ya Jenoside yakorewe abatutsi mu Rwanda muri Mata 1994.

Yisangize Inshuti.

Ibitekerezo

Tanga Igitekerezo