Abaturage bahaye Leta igitekerezo cyayifasha kugaruza ibyanyerejwe n’abayobozi

2

Abaturage barifuza ko Leta yajya ikurikirana abanyereje ibya rubanda ikabibaryoza ku neza cyangwa ku nabi

Bamwe mu baturage batandukanye hirya no hino mu mujyi wa Kigali, baravuga ko bidahagije ko abayobozi banyereza ibya rubanda bafungwa gusa, ahubwo ko bagomba no kugarura ibyo batwaye, bitakunda ngo bigakurwa mu mitungo yabo ku ngufu.

Aba baturage baravuga ibi nyuma yaho hirya no hino mu gihugu, ubu hakomeje kuvugwa itabwa muri yombi rya bamwe mu bayobozi mu nzego zitandukanye, bashinjwa ahanini kunyereza umutungo wa Leta, n’uburiganya muri gahunda zitandukanye zigamije kuzamura imibereho y’abaturage nka VUP ndetse na Girinka Munyarwanda.

Ibi byemezwa na Minisiteri y’ubutegetsi bw’igihugu (MINALOC), aho Umunyamabanga uhoraho muri iyi Minisiteri Vincent Munyeshyaka, avuga ko igenzura ryakozwe muri 2015 rijyanye n’uburyo gahunda zagenewe kuvana abaturage mu bucyene zibagezwaho mu myaka itanu ishize, ryagaragaje ko habayemo imikorere idahwitse.

Ibi kandi byanagarutsweho na Perezida wa Repubulika, Ubwo yasozaga itorero ry’abayobozi b’inzego z’ibanze i Gabiro mu Karere ka Gatsibo tariki ya 19 Werurwe 2016, aho yagarutse ku bibazo bitandukanye bikunze kuranga abayobozi nk’aho barenganya abaturage, atanga urugero kuri gahunda ya Girinka.

Abaturage ku ruhande rwabo baganiriye na Makuruki.rw, bavuga ko bitumvikana uburyo abantu bahabwa buri kimwe na Leta, barangiza bakagaruka inyuma bagatwara ibya rubanda, birengagije abakene batagira n’inzara zo kwishima.

Kabagire Aman utuye mu murenge wa Rwezamenyo yagize ati: ” erega Leta ni yo ibaduteza, kubafunga no kubakura ku mirimo yabo ntabwo bihagije. Bagomba no kugarura ibyo batwaye ku neza cyangwa ku ngufu.”

We na bagenzi be bemeza ko uyu ari wo waba umuti urambye kuri iki kibazo, kuko n’ibidakorwa n’ubundi bazahora ari uko nta n’impinduka izabonekamo. Aba baturage bavuga ko batumva impamvu Leta idashyiraho amategeko nk’ayo.

Umwe muri bo yagize ati:” Buri gihe twibaza impamvu badashyiraho amategeko avuga ko abahamwe n’ibyaha byo kurya ibya rubanda bagomba kwirukanwa, gufungwa no kugarura ibyo batwaye. Ibi bizatuma bajya bagira ubwoba bwo gukora amakosa nk’ayo.”

Ibyo aba baturage bavuga, ku rundi ruhande birahura n’ibyo umuryango urwanya ruswa n’akarengane (Transparency International-Rwanda) uherutse gushyira ahagaragara byavuye mu isesengura rya raporo y’Umugenzuzi mukuru w’imari ya Leta yo mu mwaka wa 2012-13, ku itariki 29 Mutarama 2015.

Transparency International-Rwanda yasabye ko abayobozi badakoresha neza ibya Leta bajya bakurikiranwa nyuma yo kwegura cyangwa kweguzwa. Aha bavuga ko byagaragaye ko bamwe mu bayobozi b’uturere badakurikirana neza ikoreshwa ry’ingengo y’imari ihabwa ibigo nk’amashuri, amavuriro n’imirenge.

Mu gusesengura iyi raporo y’uturere twose tw’igihugu n’Umujyi wa Kigali, Transparency International Rwanda yasanze hari amakosa menshi agenda agaruka, arimo kunyereza no gusesagura umutungo wa Leta, gukoresha amafaranga ntihagire inyandiko zibigaragaza (supporting documents) n’ibindi.

Umuyobozi w’uyu muryango Madamu Ingabire Immaculée avuga ko kugira ngo amabwiriza y’Umugenzuzi mukuru w’imari ya Leta yubahirizwe, umuyobozi wese ugize uruhare rwo gukoresha nabi umutungo wa Leta akwiye guhagarikwa ku mirimo ye, akagaruza ibyo yangije kandi agakurikiranwa no mu mategeko.

Kuri we ngo kwegura ku mirimo nyuma yo kwangiza umutungo wa Leta ntibihagije.

Muneza Ferdinand

MAKURUKI.RW

Yisangize Inshuti.

Ibitekerezo 2

  1. I discovered your blog site on google and test a number of of your early posts. Proceed to keep up the excellent operate. I simply extra up your RSS feed to my MSN Information Reader. Looking for forward to reading extra from you in a while! bgeggdgeafgckdbd

Tanga Igitekerezo