Umusore wahimbye imideri yateje impaka ati "Jye sinkorera MINISPOC"

4

Umusore uherutse kumukurika imideli itaravuzweho rumwe na benshi ahanini bitewe n’uburyo yasaga n’iyerekana ubwambure bw’abakobwa bayerekanaga, yikomye abantu bose banenze iyi myenda ngo kuko ihabanye n’umuco nyarwanda yemeza ko imyenda ye na yo yerekanaga umuco nyarwanda ndetse ko baramutse bamubwiye ko batamushaka yajya gukorera ahandi bafungutse mu mutwe babimenyereye.

Kuwa 25 Kamena 2016 ni bwo habaye igikorwa cyo kumurika imideli cyiswe Kigali Fashion Week cyari cyitabiriwe n’abanyamideli batandukanye bo mu bihugu bya Afurika ndetse no hanze yayo.

Iyo mideli yarerekanwe n’abakobwa bari bambaye utwenda duto cyane tugaragaza bimwe mu bice by’ibanga byabo, abantu bakaba barabinenze bavuga ko bihabanye n’umuco nyarwanda.

Mizero Cedric wakoze iyi mideli, yatangarije Makuruki.rw ko imyenda yerekanye yayise “Transaformation”, aho ngo yashakaga kugaragaza uko wakwambara umwenda umwe ariko ukagenda uwuhinduranya bitewe n’uko ushaka ko umera.

Ku kuba iyi mideli ye itarakiriwe neza n’abanyarwanda batandukanye harimo n’inzego z’ubuyobozi, Mizero Cedric avuga ko ntacyo bimubwiye ngo kuko hari icyo yari agambiriye kwerekana, yewe ngo ntakorera MINISPOC cyangwa se abandi batekereza nkayo.

Yagize ati “ Nari nabitekereje mbere y’uko nanabikora, ntacyo byari bimbwiye kubera ko ntago nkorera MINISPOC, ntago nkorera abantu… nkorera abantu biyumva nk’uko niyumva, nkorera abantu batekereza. Sinzi icyo bagenderaho banga ibintu, njyewe nerekanye icyo nari mfite mu mutwe.”

Kuba baravuze ko imideli ya Cedric itajyanye n’umuco nyarwanda Cedric avuga ko buri wese afite uko yatanga ubusobanuro bw’umuco nyarwanda ndetse ko na we imyenda ye ifitanye isano n’umuco nyarwanda ngo uretse ko no kumurika imideli bitari mu muco nyarwanda.

Yagize ati “Sinzi bo ubusobanuro bw’umuco nyarwanda ari ubuhe, nanjye mfite ubusobanuro mpa umuco nyarwanda, kuva na kera umuco nyarwanda wahozeho no ku bwa ba Gihanga bambara inshabure n’inkanda, njyewe uwo ni wo muco ngederaho, uretse ko na fashion atari umuco nyarwanda ni ibintu byazanywe n’abazungu.”

Mizero cedric kandi avuga ko kuba imideli yakomanyirizwa ntiyongere kumurikirwa mu Rwanda kubera ko ihabanye n’umuco nyarwanda, avuga ko nta bwoba bimuteye ngo nibaramuka bamubwiye ko batayishaka ngo azayerekana ahandi babisobanukiwe.

Yagize ati “ Njye ntago nkorera u Rwanda gusa, nkorera isi yose, nkorera abantu bafungutse bitewe n’ibihe turimo, niba batabishaka ubwo twazajya gukorera ahandi cyangwa tukareba ukundi tubigenza.”

Mizero Cedric avuga ko asobanukiwe neza ibijyanye n’imideri kandi ko abantu bakunze ibihangano bye ndetse akaba yaranabonye ubutumire mu bihugu bitandukanye abikesha imyenda abandi bita iy’urukozasoni.


Imyenda byavuzwe ko isebya umuco nyarwanda

Yisangize Inshuti.

Ibitekerezo 4

Tanga Igitekerezo