The Ben na Angel Mutoni mu bahanzi 10 ndakuka bazahatanira ibihembo bya RFI

The Ben na Angel Mutoni bahatanira ibihembo bitangwa na RFI

Abahanzi babiri b’abanyarwanda mu njyana ya RNB na Hip Hop aribo Mugisha Benjamin uzwi nka The Ben na Angel Mutoni bagaragaye mu bahanzi 10 ndakuka batoranyijwe mu guhatanira ibihembo bya Prix Découvertes RFI 2016 bitangwa na Radiyo mpuzamanga RFI.

Aba bahanzi The Ben na Angel Mutoni bahatanye n’abandi bahanzi umunani baturuka mu bihugu bitandukanye byo ku mugabane wa Afurika.

Amakuru dukesha RFI aravuga ko biteganyijwe ko gutora abahanzi bahatanira ibi bihembo bya Prix Découvertes RFI 2016 bizasozwa tariki 19 Ukwakira 2016.

Biteganyijwe ko akanama nkemurampaka kazaterana tariki 4 Ugushyingo 2016 kugira ngo hatoranywe uzegukana ibi bihembo.

Aka kanama kazaba kayobowe n’umuhanzi w’umuraperi uzwi cyane mu njyana ya Hip Hop Kery James.

The Ben kuri ubu ubarizwa ku mugabane wa Amerika muri Leta zunze ubumbwe za Amerika aho akomeje gukorera umuziki we ndetse akaba anitabira ibitaramo byinshi bitandukanye ni umwe mu banyarwanda bagaragaye mu bahanzi bahatanira ibi bihembo.

Mutoni Angel akunze kwibanda ku ndirimbo ziri mu rurimi rw’Icyongereza nka ntaramenyekana cyane mu Rwanda ariko abamuzi bemeza ko afite ahazaza heza mu muziki.

Angel amaze kwitabira ibitaramo bitandukanye birimo Kigali Up, DoaDoa na Amani Festival2016 yabereye i Goma muri DRC kuri ubu akaba yaratangaje ko yishimiye kujya muri aya marushanwa kuko bizamufungurira izindi nzira.

Abahanzi bazahatanira ibihembo bya RFI uyu mwaka ni The Ben (Rwanda), Angel Mutoni (Rwanda), Itsinda As Gang (Côte d’Ivoire), Pamela Badjogo (Gabon/Mali), Atis Constant (Haïti), Daba (Sénégal), Kandia Kora (Guinée), Minah (Madagascar), Soul Bang’s (Guinée) na Stella Afro (Madagascar)

Abahanzi 10 bazitabira amarushanwa ya Prix Découvertes RFI

Iri rushanwa rimaze gutsindirwa n’abahanzi bakomeye muri Afurika mu myaka rimaze kuba, rimaze gutwarwa na Tiken Jah Fakoly (Côte d’Ivoire), Rokia Traoré (Mali), Didier Awadi (Sénégal), Amadou na Mariam (Mali) na Maurice Kirya (Uganda)

Mu mwaka wa 2013 Mani Martin wo mu Rwanda yararyitabiriye ariko ntiyabasha gutsinda.

Iri rushanwa ngarukamwaka rihuza abahanzi b’abanyempano muri Afurika, uwa mbere agahabwa igihembo gikomeye cy’amayero ibihumbi icumi [10,000 euro], gukora ibitaramo bizenguruka Afurika na kimwe gikomeye umuhanzi ategurirwa mu Mujyi wa Paris.

Prix Découvertes RFI itegurwa ku bufatanye na Sacem, Institut Français, Umuryango Mpuzamahanga w’Abavuga Igifaransa na UNESCO.

Yisangize Inshuti.

Ibitekerezo

Tanga Igitekerezo