Sofia yagaragaje icyaca imyenda iteye isoni iharawe n’abahanzikazi nyarwanda

Umuhanzikazi Sofia umenyerewe cyane mu gucuranga inanga gakondo, aranenga abahanzikazi b’abanyarwanda biyambika ubusa bigana ibyamamare byo muhanga ariko akanavuga ko icyabica burundu ari ukubegera bakerekwa inzira nziza bakwiye kunyuramo.

Benshi mu bahanzi nyarwanda baririmba injyana za kizungu bakunze kwigana imibereho y’abahanzi bo muri Amerika ari na ho hari igicumbi cy’injyana nyinshi zikunzwe n’urubyiruko muri iki gihe.

Hari bamwe mu bahanzikazi bitwikira iterambere n’ubwoko bw’umuziki bakora maze bakiyambika imyenda benshi bavuga ko iteye isoni dore ko bimwe mu bice by’ibanga byabo biba biri ku karubanda, nyamara ukabona bo nta cyo bibabwiye.

Umuhanzikazi Sofia ni umwe mu bakobwa batinyutse gukora umuziki ndetse akora umuziki utandukanye n’uw’abandi dore ko we acuranga inanga ya gakondo.

Sofia avuga ko kuba hari abakobwa b’abahanzikazi biyambika imyenda iteye isoni biterwa ahanini no kuba bumva bashaka kuba nk’ibyamamare byo muri Amerika ndetse no kujyana n’iterambere. Ikindi ni uko hari abashaka gukora bagatangira gukora umuziki nta muntu bagishije inama ubifitemo uburambe.

Yagize ati “Abana bacu barareba televiziyo bakabona abahanzi bo muri USA, bakareba imyambarire yabo n’ibiki byose bagashaka kubigana. Ikindi ni uko umwana abyuka akiyumvamo impano akajya muri studio nta shuri yanyuzemo, nta n’abandi bantu yaganirije bakuru mu bijyanye n’ubuhanzi…”

Sofia kandi asanga igikwiye guca iyo myambarire ihabanye n’umuco nyarwanda ari uko abahanzikazi bajya barebera kuri bakuru babo ndetse bakaganirizwa kugeza igihe bumviye ko bibafitiye akamaro.

Yagize ati “Ntekereza ko nta we ukwiye kubatera ibuye ngo bambaye ubusa ibintu byacitse, hamwe no kubaganiriza no kuberera imbuto nkatwe b’abamama, ntekereza ko gahoro gahoro bizacika uko agenda abitindamo ahura n’abandi bigeza igihe na we akamenya igikwiriye.”

Imyambarire iteye isoni mu bahanzikazi nyarwanda itangiye gukaza umurego mu myaka mike ishize, ndetse bikaba byaratumye Minisitiri w’Umuco na Siporo Uwacu Julienne yerura akavuga ko anenga imyambarire ihabanye n’umuco nyarwanda yiharajwe n’abahanzi ndetse n’abahanzikazi nyarwanda.

Yisangize Inshuti.

Ibitekerezo

Tanga Igitekerezo