Rwanda Inspiration Back Up isize inkuru ki i musozi? Prince Kid ati "nta cyo nishinja"

Ubuyobozi bwa Rwanda Inspiration Back Up buravuga ko mu myaka 3 ishize bwaratsindiye isoko ryo gutegura amarushanwa ya nyampinga w’u Rwanda hari byinshi bwishimira birimo kuba bwarateje intambwe igikorwa cya Miss Rwanda bukanashimangira ko nta kosa na rimwe bwigeze bakora.

Mu mwaka wa 2013 ni bwo kompanyi ya Rwanda Inspiration Back Up yatsindiye isoko ryo gutegura igikorwa cyo gushaka nyampinga w’u Rwanda, aho iryo soko amasezerano yari ifite yarangiye muri uku kwezi kwa Kamena 2016.

Mu Kiganiro Makuruki.rw yagiranye n’umuyobozi wa Rwanda Inspiration Back Up Kagame Ishimwe Dieudonnee, yavuze ko hari byinshi bishimira bageraranije n’aho bakuye iki gikorwa cya Miss Rwanda birimo kuba igikorwa cya Miss Rwanda cyarashyizwe ku ngengabihe ihoraho ndetse no kuba nyampinga w’u Rwanda asigaye ahembwa amafaranga ashimishishije.

Yagize ati “icya mbere twishimira ni uko Miss Rwanda izi saha iri kuri calendar, buri muntu wese arabizi ko iba mu kwezi kwa kabari mu cyumweru cya nyuma, mu gihe twari tumenyereye ko nta mwaka nta kwezi iberaho. Miss Rwanda asigaye ahembwa ku buryo bushimishije iyo bavuze guha imbaraga umwana w’umukobwa wumva ko n’aho irimo koko.”

Ikindi Kagame yishimira ngo ni uko ubu Miss Rwanda yageze ku rwego mpuzamahanga ndetse n’uburyo bikorwa bikaba bikorwa mu himakazwa cyane umuco nyarwanda.

Yagize ati “Miss Rwanda kugeza ubu twayishyize ku rwego mpuzamahanga, ubu dusigaye dutora ibisonga 4 turatumirwa mu marushanwa mpuzamahanga yaba ari FESPAM, Miss Hertage Grobal, ukareba n’iza aba bakobwa b’uyu mwaka bateganya kwitabira n’ubutumwa twakira buturutse ahandi. Ikindi Miss Rwanda ibaho ariko ugasanga za nshabure, ibikoresho by’abanyarwanda turacyabiha agaciro, wa mwiherero w’abakobwa uracyahari…”


U Rwanda rurahagararirwa mu marushanwa mpuzamahanga

Iyo ugeze ku byaba bitaragenze neza, umuyobozi wa Rwanda Inspiration Back Up ararahira akirenga akemeza ko nta kosa na rimwe yaba yarakoze ndetse ko nta cyo yari yariyemeje kugeza kuri Miss Rwanda atakoze.

Yagize ati “ simpamya ko hari ibintu twishinja twaba tutarakoze gusa twebe ikituraje ishinga ku buryo turamutse tudakomeje twasaba abazakomeza gukomeza kuzamura Miss Rwanda turabizi hari ibyinshi tutarageraho.”

Ese koko Rwanda Inspiration Back Up ntiri kwitaka?

N’ubwo Umuyobozi wa Rwanda Inspiration Back up yemeza ko ibyo yifuzaga mu gihe amaranye isoko ryo gutegura igikorwa cya Miss Rwanda byose byagenze neza, ariko ntawakwirengaziza bimwe bitagenze neza birimo nko kuba Miss Akiwacu Colombe yarahawe imodoka yashaje nyamara mu kwamamaza iki gikorwa baravugaga ko azahabwa imodoka nshya.

Kuba ba nyampinga batarakurikiranywe neza ngo bashyire mu bikorwa ibyo biyemeje dore ko mbere ya 2016 ibikorwa bya ba nyampinga byagiye bikemangwa ndetse ibisonga byo bikaba nta n’uwamenyaga aho byarengeye bikaba byaraturukaga ku kuba nta bihembo bahabwaga, benshi bagashinja abateguraga iki gikorwa kugira uruhare mu kudatanga umusaruro kwa ba nyampinga.

Ikindi cyagaragaye nk’ikitaragenze neza mu gihe Rwanda Inspiration Back Up yamaze itegura Miss Rwanda, ni ukutumvikana na Miss Kundwa Doriane aho byari biturutse kuri 30 % bari kuzajya bafata ku mushara wa Kundwa Doriane mu gihe bamubereye umujyanama ibi bikaba byaranatumye bahita basesa amasezerano.


Miss Kundwa Doriane n’ibirango yambaraga zabyaye amahari

Nyuma y’itorwa rya Kundwa Doriane kandi hagaragaye uwakoze ibirango bya Miss Rwanda (logo) na we wavugaga ko iyi sosiyete yamwambuye amafaranga agera kuri miliyoni imwe ndetse anasaba ko ibyo birango bitongera gukoreshwa nk’uko byagaragaye mu ibaruwa yandikiye Rwanda Inspiration Back Up.

Rwanda Inspiration Back Up kandi yagiye igirana ibibazo n’itangazamakuru mu gihe babaga bari gutoranya abakobwa bahagararira intara muri Miss Rwanda, aho abanyamakuru bagiye basohorwa ndetse abagaragaje ibitagenze neza bakabuzwa kugaruka gutara inkuru zerekeranye na Miss Rwanda. Ibi bikaba bitarashimishije na gato Urwego rw’Abanyamakuru bigenzura (RMC) ndetse isaba MINISPOC kubikosora abanyamakuru bagakora akazi kabo nk’uko babyemerwa n’Itegeko Nshinga.


Ibaruwa yandikiwe Rwanda inspiration Back up

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo